No.5103/2020-2021
Dated Aizawl, 15th September, 2020: Mizoram Sawrkar chuan COVID-19 hripui leng mek karah Mizoram mipuite eizawnna leh chetvelna kawnga hmaklak dan tur chungchangah thupek leh inkaihhruaina te chu kan hun tawn ang zelin a chhuah thin a. 01.09.2020 atanga 30.09.2020 chhunga inkaihhruaina kan zawm tur chu Order No.B.13021/101/2020-DMR/Pt.III dated 31.08.2020 hmangin a chhuah bawk a, hei hi Mizoram pum huapa zawm tura siam a ni.
A chunga tarlan thupek leh inkaihhruaina te hi tunlai Mizoram dinhmun thlir chunga uluk taka ngaihtuah hnua duan a ni a. Central Sawrkar-in thupek a chhuah ai pawha khauh hret zawk zela ruahmanna te pawh siam a ni.
Sawrkar hmalakna te awmze nei taka tihhlawhtlin a nih theih nana Local/ Village Level Task Force te inpekna leh thawhrimna te chu Sawrkar chuan a hlut tak zet a. Hei bakah hian tlawmngai pawl leh kohhran hrang hrangte hmalakna avangin Mizoramah vawiin thlengin COVID-19 vanga nunna chan kan la awm lo hi a lawmawm hle a ni.
Chutihkarah chuan Aizawl khawpuichhunga veng thenkhatah leh district thenkhatah Mizoram Sawrkar thupek kalh zawng leh mipuite nitin khawsakphunga harsatna nasa tak thlen thei zawnga hmalakna a awm tih hriat a ni a. Sawrkar hriatpui lova veng emaw khawbil inkharkhipna thupek chhuah hriat tur a awm nual a, chhungkaw thenkhat, in quarantine mekte in, pawn lam atanga tala-a kalhhnan thu hriat tur a awm zeuh zeuh bawk a. Tin, veng thenkhatah Sawrkar office lo khar thawm leh Sawrkar hnathawk, Sawrkarin duty tura a ruatte pawh an duty hlen chhuak thei lova LLTF/VLTF thenkhatin an siamthu a awm nual bawk. Hei hi Sawrkar chuan pawi a ti hle a, COVID-19 laka mipuite inveng chunga nunphung khaihlak lutuk lova kan kal zel dan tur ruahmanna Sawrkarin a siamte hi tha taka zawmturin kan in chah nawn leh a ni.
A chungatarlan Order-in a ken tel Inkaihhruaina-a Para No. III in a sawi angin, ‘containment zone’ puang theitu chu The Mizoram Epidemic Diseases (COVID-19) Regulations, 2020-in thuneihna a pek, Chief Secretary leh Deputy Commissioner-te chauh an ni a. Containment zone-a puan ngai a lo awm a nih pawhin Health & Family Welfare Department hotute rawnin risk assessment mumal tak siam hnuah chauh puan tur a ni. Tin, Ministry of Home Affairs chuan containment zone pawn lama lockdown puan a lo ngai anih pawhin State Sawrkarin Central Sawrkar rawn chungin a puang tur ani tih thupek a chhuah nghe nghe a ni.
Chuvangin, pheikhairual taka hma kan lak chhoh tlan theih na’n leh Sawrkar hmalaknate tih thuanawp anih loh na’n heng Dan hrang hrang - Disaster Management Act, 2005, The Mizoram Epidemic Disease (COVID-19) Regulations, 2020 leh The Mizoram (Containment and Prevention of COVID-19) Ordinance, 2020 - hnuaia thuneihna pek te’n thupek leh inkaihhruaina an siam te kalh zawngin tumahin thupek emaw kalphung hran an siam tur ani lo.
Sawrkar-in Mizoram pum atana hman tur Order a chhuah piah lama district emaw khaw/veng bil atana a bika hmalak tulna riau a awma nih erawh chuan LLTF/VLTF te’n an district Deputy Commissioner hnenah an thlen anga, a tul anga hmalak a ni ang.
