Vawiin khan Kolasib DC Pu H. Lalengmawia, IAS hovin District AIDS Prevention & Control Committee (DAPCC) chuan DC Conference Hall-ah meeting an nei a. Kolasib District-a HIV dinhmun tunhnaia sang chho ta nia lang chungchang thlirletin awareness tun aia nasa leh zawka neih a tul thu meeting chuan a tarlang.

Pu H. Lalengmawia chuan District a HIV vei an pung chho chu ngaihtuahawm a tih thusawiin HIV/AIDS dona kawnga beidawng lova, tha thlah lova hna thawh a pawimawh leh zuala, sum harsatna chu hmasawnna tithuanawptu leh daltu a ngai lovin hma lam min nawr kaltirtu zawka ngaiin kan hma zawn theuhah HIV dona kawnga hma kan lak a ngai a ni, a ti. Forum awm thei zawng zawnga HIV awareness a tam thei ang bera kan tih hi kan tihmakmawh tur a ni tiin Education Campaign a neihna turah pawh hemi chungchang hi a sawi tur thu DC hian a sawi bawk a ni.

DAPCC tarlan danin April 2015 leh December 2015 inkar khan general population atangin thisen 2196 an test a, chuta tang chuan HIV kai mi 70 an hmuchhuak a. Hemi hun chhung vek hian nu nau pai 1862 thisen an test atangin mi 8 ah HIV kai an hmu a, a kai tam ber chu kum 25 leh 34 inkar mite an ni a. Kum danga damdawi a inchiu thin ten syringe thinghlim lo an hman avanga HIV kai te an tam loh laiin 2015 leh kumin January thla a HIV kai an hmuh chhuah te chu za zelah 40 vel chu inchuina thianghlim lo hman vang niin an tarlang a. District chhunga hian HIV damdawi ART la mek mi 203 an awm mek a, an zinga tam zawk chu hnathawh mumal nei lo an ni.

Kolasib District-ah hian kum 2002 atang khan HIV test tan a ni a, June 2002 atanga October 2014 thleng khan mi 42614 thisen an test a, heng atang hian HIV hrik pai mi 587 a hmu a. 42614 atang hian nu naupai mi 19172 awmin an zing atang hian mi 70 HIV pai hmuh a ni.

Vawiina meeting-ah hian District AIDS Prevention & Control Unit hnuaiah thuang khatin HIV/AIDS veite enkawl leh chhawmdawl chungchang sawiho a ni bawk.