1261/2022-2023
Champhai, the 15th July, 2022: Vawiin chawhma dar 10:00 khan Vaphai khuaah zirna, ei leh bara intodelh tura thiam thil zir, sum leh pai enkawl dan leh ASF chungchanga inzirtirna, 'Career guidance, skills development and entrepreneurship training, financial literacy campaign & African Swine Fever (ASF) awareness training' chu Village Council Vaphai buatsaihin neih a ni. He hun hi District Bawrhsap Pu James Lalrinchhana chuan khuallian niin a hmanpui a ni. Vaphai VC hnenah silpaulin leh tanpuina sumfai Rs 5,000/- a hlan a ni.

Khuallian Pu James Lalrinchhana chuan hun rei tawh tak atanga ruahmanna awm tawh, hmasawnna tura pawimawh hrang hrangte inzirtirna Vaphai khuaa a taka puitlin a ni ta chu lawmawm tiin, program hlawhtlinna tura hma la a thathawhtute chhuanawm a tih thu a sawi a. Hmabak eng tak nei zirlaite chu thiamna tak tak nei turin nasa lehzuala tanlak a ngaih thu hrilhin, zirlaibu bel taka thiam tum tur leh bye heart ngawt tum lova thiamna tak tak neih tum zawk turin a chah a. National Education Policy duan thar chuan thiamna tak tak hmanga Zirlaiten mahni irawm chhuak ngeia thu an phuah thiam a duh a ni, a ti a. Lehkha chhiar tam tur leh tum mumal neih tum turin a fuih a. Nu leh pa kalkhawmte chu rualawhna dik nei tur leh an fate zirlai chungchang titi tam pui tur te, in chhung khurah lehkha zir nana boruak muanawm siam tum turtein a fuih a. Ruihhlo laka thangtharte an fihlim theih nan fate chinchang hriaa chîk fo thin turin a chah bawk.

Bawrhsap chuan ramngaw leh nungcha humhalh kawnga tanlak a ngaih thu tarlangin, kalkhawmte chu sik leh sa bakah ecological balance vawnhim ngaipawimawh turin a chah a. District ralmuang leh muanawm nei turin dan leh hrai zirchian leh thuneitute thuchhuah zawm that a tul thu sawiin, mipuite chu dan chungchang hre chiang tura ngaihven fo turin a fuih a. Vaphai khawtlang tana hmasawnna rahbi hrang hrang inzirtirna buatsaih chu malsawmna thlentu a nih ngei theih nan duhsakna a hlan a ni.

Vaphai Community Hall-a training neih hi Vaphai VCP Pu Thangngaihzuala chuan kaihruaiin Pu C.Lalthazuala, Assitant Commissioner of State Tax, Champhai chuan Zirlaite tan Career Guidance hun a hmang a. Er. Lalthlansanga, Core Faculty (RE), SIRD&PR in skill development leh entrepreneurship chungchang a zirtir a, Pu Jyoti Munna Soren, Lead District Manager (LDM), Lead Bank, Champhai leh Centre for Financial Literacy, Champhai atangin Centre Manager Pu C.Lalthlengliana leh Field Coordinator Pu Lalmuansanga ten Bank chungchang leh hamthatna awmte inhrilhhriatna Financial Literacy Campaign pualin hun an hmang a. Dr. Lalrinhlui, Vety Officer, District Veterinary Hospital Champhaiin African Swine Fever (ASF) chungchang a sawifiah bawk.