No.514/2020-2021

Dated Serchhip, the 22nd April, 2020: Vawiin hian Dr. Lalzirmawia Chhangte, IAS, Deputy Commissioner chuan Serchhip khaw chhunga Village Level Task Force hrang hrang aiawhte chu DC Conference Hall, Serchhipah meeting a neih puia. Inkharkhip thawh hnihna kalpui mekah nasa lehzuala tan la theuh turin a sawm.

Bawrhsap chuan Village Level Task Force ten theihtawp chhuaha hma an lak thin avangin lawmthu a sawi a. India ram state dang ten an neih ve loh Village Level Task Force kan nei hi kan vannei hle a ni, a ti. Covid-19 laka kan him zel theih nan tuna kan tih ang bak hi chu khawvel hian tih dan dang a hre bik chuang lova, a damdawi hmuhchhuah a la nih loh avangin tuna kan hmalakna hi mawlmang viau mahse invenna tha ber a ni rih a ni, a ti. Village Level Task Force te chu theihtawp chhuaha intuai thar sauh sauh turin a chah a ni.

Pi C. Lalduhzuali, SDO (S) chuan District Level a hmalak leh inkaihruaina hrang hrangte a sawi a. State ramri pela bungraw la tur chuan Home Department phalna lak a ngai a, Essential Commodities bik la tur chu phalna hranpa ngai tawh lovin an kal anga, ramri a checkgate ah erawh an inhriattir tur a ni, a ti a. State pawn atanga bungraw daha lokal driver chu a bungruate a hlan thlak zawhah a haw leh mai ang a, state chhung a mi state pawna bungraw phurtute erawh chu mipui nena inawmpawlh zui a rem loh avangin a inkhung hran zel a tul thu a sawi. Hnam dang tangkhangte hnenah district pawisa atanga chhawmdawlna pek a la ni lova, an chenna khawtlang hruaituten an chhawmdawl thin thu a tarlang thung.

Pu Vanlalhmachhuana, MCS,EO chuan Supply Chain Committee din a nih thu leh ei leh ina district dinhmun thlithlai reng a nih thu a sawi a. PMUY atanga mi harsat zawk ten thla thum chhung Gas an lo lak ve na tur an Bank Account a pawisa thun sak an nih thu te, PMJDY atanga hmeichhe te bank account ah thla thum chhung Rs. 500 dah sak thin an nih tur thu te, Mizoram Building and Other Construction Workers Welfare Board in an hnuaia inziaklutte Account ah Rs. 3000 an thun sak thu te a tarlang a. Heng tanpuina dawng thei te bank account-ah tanpuina hi a lo la lut lo anih chuan lo bengvar sak turin VLTF hruaitute hi a ngen nghal a ni. Nitin mamawh bungrua, phai lama zu lakna a to thut hlawm avangin Serchhipah MRP anga beisei theih loh bungrua a awm nual thu pawh sawi langin, chutihruala man to uchuaka hralh an awm chuan thuneitute hnena thlen zel tur a nih thute a sawi bawk a. Gas hnianghnar kan neih theih nana theih tawpa tan lak reng a nih thu leh, connection nei tam leh Gas bur nei tam zawk ten midang ken nachang kan hriat tlan a tul thu a tarlang bawk a ni.

Sub Headquarters YMA Serchhip aiawh hnen atangin ramria duty te tanpuina atana bawm dawh atanga an hmuh Rs. Nuai 2 chuang chu ramria duty hnenah hlan anih tawh thu report ngaihthlak a ni bawk.

Meetingah hian Pu R. Sathiyasundaram, IPS, SP leh Pu HD Lalpekmawia, Addl. DC te an tel a. Serchhip khaw chhunga Village Level Task Force zawng zawng aiawhte an kal kim bawk a, tha zawka inkharkhipna kalpui anih theih nan rawtna hrang hrang an neihte ngaihthlak niin, an huam chhung theuhah khauh zawka inkharkhipna kalpui theuh an tum thu an sawi hlawm a ni.