1294/2024-2025

Siaha the 24th July 2024: Pre Potential Linked Credit Plans (Pre PLPs) for FY 2025-26 chungchang rel turin vawiin khan DC Mini Conference Hall, Siaha-ah thutkhawmna neih a ni a, District Bawrhsap Pu VL. Hruaizela Khiangte chuan he hun hi kaihruaiin Lead District Manager, Lead Bank Office, District Development Manager NABARD te bakah Siaha District chhunga bank branch hrang hrang SBI, MCAB, MRB, IDBI leh HDFC aiawhte leh sawrkar department aiwhte an thukhawm.

NABARD District Development Manager chuan vawiin thutkhawm chhan chu sawiin District tin te dinhmun thlirin PLP duan thin a nih thu a tarlang a, chumi plan mil chuan Annual Credit Plan (ACP) buatsaih a nih thin thu a tarlang. DDM chuan ACP an duante chu a taka chantir theih (realistic) leh tih hlawhtlin theih (achievable) nise a duh thu sawiin loneitute leh entrepreneur te hmakhua ngaia, an hman tangkai theih tur zulzuia plan siam thin turin a ngen a ni.

Vawiin Meetingah hian kum hmasa nen tehkhinin sector hrang hranga district hmasawnna thlir ho a ni a, Pre- PLP duan leh turah priority pek tur sector-te rel a ni. Nikum Annual Credit Plan nen tehkhinin bank branch hrang hrangte hmalakna thlir ho a ni a, a target theuh an hlen chhuah dan leh hmasawn ngai leh siamthat ngai awm te sawi ho a ni bawk . Lo neituten a taka an hman tangkai theih tur project duan chungchangte, an thlai thar zawrh chhuah kawngah harsatna awm lova an hralh chhuah theih nan te, an kumkhat lakluh zat tihpun a nih theih nan te leh a mamawhtu dik tak ten a hun taka loan an hmuh theih nan bank hrang hrang hotutu chu tan la lehzual tura ngen an ni a, sawrkar department-te pawh an hnuaia farmer theuh ten hlawkna an hmuh ngei theihna turin hamthatna awmte mipui hrilhhriat kawngah tan la lehzual turin leh department dangte nen thawhhona tha (convergence) nei zel tura theihtawp chhuah turin ngen an ni bawk a ni.

Vawiin thutkhawm zulzui hian FY 2025-26 Annual Credit Plan buatsaih leh tur a nih angin kalkhawmte hnen atangin rawtna an neih te ngaihthlak ho a ni a, convergence neih dan tur te pawh sawi ho nghal a ni.