Vawiin khan Champhai DC Conference Hall-ah ri hre tha theilo te zawngchhuaka, bengngawng awm lohna tura hmala tura din, District Co-ordination Committee for National Hearing Awareness Campaign (NHAC) chu Bawrhsap Pu Mark Lalthanliana hovin an thukhawm a, ri hriat kawnga harsatna neite tana hmalakna tur ‘National Programme for Prevention and Control of Deafness (NPPCD)’ kaltlanga hnathawh dan turte an sawiho a ni.

Pu Mark Lalthanliana chuan ri hriatna thalo atanga harsatna nasa zawk pumpelh thei tur chuan a hma thei ang bera mithiamte rawn vat a tul thu a sawi a. Bengngawng leh a kaihhnawih harsatna dangte laka fihlima, an lo awm palh anih pawha chhawmdawlna tha tak pek anih theihna turin line department hrang hrangte tanrual angaih takzet thu sawiin, district tuamchhuaka thingtlang khaw kilkhawr berte thlengpha hmalakna kalpui angaih thu a sawi a ni.

Dr. R. Lalawmpuia, CMO Champhai chuan NPPCD kalphung leh tum tlangpui sawifiahin, Beng thalo tam zawk chu ven theih anih thu a sawi a. Naupan lai emaw a lo lanchhuah tantirha enkawl nghal chuan bengngawng hi ven theih a ni tiin, Hearing Aid-te pawh Health Care Scheme hnuaiah telh anih tawh thu a sawi bawk.

Meeting chuan naktuk March Ni 3, 2020 (Thawhlehni) chawhma dar 11 atang hian National Hearing Awareness Programme kalpui tan nise a ti a. District Hospital, Champhaiah Outreach Camp hawnna neih nise tiin, programme kimchang a duang nghal a. He hunah hian NPPCD zirchianna leh Beng thalo te tana a thlawna inentirna hun ‘Free Hearing Clinic’ neih nghal a ni ang. Heng bakah hian Champhai District Hospitala mamawh leh hmanraw neihte leh hnathawh theih chente sawiho niin, tun dinhmunah chuan hmanraw mamawh angte la awm kim vek rihlo mahse hmanraw tha tak takte hmangin hmalak mek zel anih thu tarlan a ni.

NPPCD hi ri hriatna lama harsatna neite zawngchhuaka, chhawmdawlna leh tanpuina hrang hrangte pe thin tura siam niin, kum 2006 ah khan India rama kalpui tan niin, Mizoramah chuan kum 2014 atang khan kalpui tan a ni a, district zawng zawng a tuamchhuak tawh a ni. Champhai District Hospital-ah pawh Audiologist leh thawktu dangte awmin, Beng lama harsatna nei leh ri hriat kawnga harsatna neite zawngchhuaka tanpui turin hma an la a ni.

Mizoramah January 2019 atanga January 2020 chhungin mi 25,431 te Beng endikna atangin mi 12,781 ten Beng lama harsatna an nei tih hmuhchhuah a ni a. Heng zinga mi 3,262 te chu ri hre tha thei tawhlo Bengngawng kan tih te an ni a. Mi 1,047 te chu Beng dar, Hearing Aid vuah tura tih an ni a. Mi 217 te Beng zai sak niin, Beng natna tlakbuak mi 10,208 awmin, mi 4,600 te Beng chu zirbing sak an ni bawk. NPPCD Champhai Report, January 2019-February 2020 thlenga tarlan dan chuan Beng entir mi 4,043 zinga mi 1,375 te chuan Beng lama harsatna an nei tih hmuhchhuah a ni a, mi 385 te chu Bengngawng niin, mi 133 te Beng dar vuah tura tih an nih bakah mi 626 te Beng chu zirchian sak an ni.