Vawiin khan Kolasib DC Conference Hall-ah District Core Committee on Lab to Land Initiative , DC Pi Niharika Rai, IAS hovin neih a ni.

Thuhma sawiin DC chuan Lab to Land Initiative hi mipuite tana thil pawimawh tak, sawrkarin mipui dawmkan nana scheme hrang hrang a duan te chiang zawka an lo hriat theihna tur a nih avangin Line Department tin ten uluk taka kan kenkawh a ngai a ni, a ti a. Department te chu te lua awm lova an scheme leh programme puanzar kawngah tan la turin a chah a ni.

Lab to Land atana hmalakna tur hian sawrkar laipui duhdanin Bharat Nirman Volunteer , Kolasib District chhunga khaw engemawzatah ruat an ni tawhin heng mite hi SIRD chuan training a pe tawh bawk a. Thingdawl RD Block chu sawrkarin Pilot Project atan a thlang a. Hemi hnuaiah hian BNV 143 an awm a ni.

Lab to Land Initiative- in a tum ber chu RD Programme hrang hrangte mipuiin an hriat a, Danin an chanvo (rights) a pekte an chan ngei theih nan leh an tihtur te dik taka an tih ve zel theih nana a zau thei ang bera hriattir a ni a. Hemi tipuitling tur hian Bharat Nirman Volunteer te khaw tina ruat tura tih a ni.

Rural Development programme bik angin a tirah kalpui ni mahse Line Department hrang hrangte chu an hnuaia scheme leh hmalakna te zau thei ang bera puanzar nise tiin vawiina Kolasib DC hova meeting chuan an rel a. An scheme te a hma thei ang bera SIRD ah theh luta chumi bawhzuia Training programme buatsaih thuai nise an ti a ni. Chumi ang chuan District Plan pawh a tul ang a duan nise an ti bawk a ni.