942/2022-2023
Aizawl the 17th June, 2022 : Vawiin khan District Council & Minority Affairs Minister Pu R. Lalzirliana pisaah amah hriatpuinain PMJVK Scheme hnuaia DPR leh Concept Note siam/buatsaih hna thawk turin District Council & Minority Affairs Department chuan Northreast Consultancy Services (NECS) nen Deed of Agreement siamin an aiawhte ve vein hming an ziak hnan a ni.

District Council & Minority Affairs Minister Pu R. Lalzirliana chuan sorkar laipuiin hnam tenau (minority) te a ngaih pawimawh em avangin PMJVK Scheme pawh chak zawk leh huam zau zawka kalpui a tum mek a, hemi Scheme hnuaiah hian DPR leh Project hrang hrang Concept Note siam/ziak/buatsaih turin NECS te thiamna leh tha chhawr a ni thei dawn chu lawmawm a tih thu a sawi a. Heng project an siam tur hrang hrangte chuan Mizorama district zawng zawngte huamin ram hmasawnna tur mamawh tam tak a phuhruk theih ngei a beisei thu a sawi bawk.

NECS nena Deed of Agreement siamah hian Mizoram sorkara District Council & Minority Affairs Department aiawhin an Secretary Dr. Lalrozama leh Joint Secretary Pu R. Vanlalsawta ten hming an ziak a ni.