No.3401/2020-2020

Vawiin chawhma khan Pu H Lalengmawi, IAS, Secretary, Health & Family Welfare Department chuan DC Conference Hall, Kolasibah District Level Task Force on Covid-19 leh Kolasib NGO hrang hrang hruaitute kawmna hun a nei a, Mizoram sawrkarin Covid-19 dona kawnga hmalakna thenkhat tarlanna hun a hmang.

Pu H Lalengmawia chuan, Kolasib chu kawng hrang hranga district pawimawh tak a nih thu sawiin Covid-19 dona kawngah pawh mihring leh bungraw mamawh chawk luh tamna ber a nih avangin hna pawh a hautak bik hle a ni, a ti a. Heti chunga ruahmanna felfai tak nen, tun thleng a hlawhtling tak a Covid-19 dona an kalpui thei chu District dangte tan a entawn tur pawimawh tak a nih thu a sawi a, “He hlawhtlinna hi Sawrkar department hrang hrangte leh khawtlang leh pawl hrang hrangte thawhhona that vang a ni”, a ti. Health Secretary chuan “India ram pum huap pawh a Covid-19 dona kawng a hma la tha ber pawl kan ni mek a, sawrkar laipui a hotute fak pawh Mizoram hian a hlawh mek a ni,” a ti a, “Hemi dinhmun luah tur hian kan ram hruaitu tha tak tak te inpekna piah lamah District leh Village level a hma latute thawhrimna leh inpekna vang a ni a, Sawrkar aiawhin inzavai a chungah lawmthu ka sawi tak meuh meuh a ni,” a ti. Pu H Lalengmawia chuan Covid-19 vei leh vei loh endikna khawl, damlohna chi hrang hrang endik tel theihna, Truenat Quattro mini PCR pawh district tin ah dah tum mek a nih thu a sawi bawk a ni.

Hun kaihruaitu Dr H Lalthlangliana, Deputy Commissioner chuan Kolasib district huam chhunga Covid-19 dona kawnga hmalak thenkhat a tarlang a, State pawn atanga lo haw te chu Sawrkar Quarantine Facility-ah chauh dah thin an nih thu te, District chu Zone 12 a then niin Zonal Executive magistrate ten an vil thin thu te leh tul bik hrang hrang buaipui tur team din a nih thu te a sawi. Counter Insugency and Jungle warfare School, Vairengte a sipai Quarantine Facility te Kolasib District Medical team ten an vilpui a, tun dinhmunah CIJWS ah hian mi 91 khunghran awm mekin Kolasib district Quarantine Facility ah 89 an awm mek bawk a ni.