Vawiin khan Lunglei DC Pu V.Sapchhunga, IAS hovin Lunglei DC Conference Hall-ah District Disaster Management Authority (DDMA) leh District Level Fire Prevention Committee te thukhawmin DDMA hmalakna kal zel chungchang leh Fire Prevention Week hman dan tur chungchang an sawiho a ni.

Lunglei District Disaster Management Authority te chuan Lunglei khawpui leh a chhehvel hmun hrang hrangte fang zelin, hmun hlauhawm thei leh chhiatrupna thleng thei thil te chu a hmunah kalin an enfiah mek zel a, DDMA Plan 2013 pawh siamthat (update) tawh a ni. Zobawk playground leimin chungchangah High-Powered Committee te hriattir an nih tawh bakah Pi Ringi, Zobawk in sakna hmun chu a him tawk loh avangin sak chhunzawm lo tura hriattir a ni tawh a, heng hi chak zawka bawhzui tum a ni. Helipad (Sethlun), Pu Hmangaihzuala side-drain (Salem) leh Forest Gate-Anganwadi inkara kawng chungchangah UD&PA te hma lak tura beisei a ni a. Pu R.Lalbiakngura, Sethlun mau hmun thiah tura hriattir a nih angin a hmalakna report pawh dawn a ni. Pu K.Vanlalmuana leh Pu F.Lalrinchhunga, Sethlun te in kawta tuihawk tling chungchangah EE, PWD(Highway Divn) pawh hriattir a ni tawh a; Lunglei Town parallel Road leh JB College inkara mimal inhmun site development chhunzawm tawh lo tura Order siam a ni tawh bawk a ni. D&D School, Salem kawng chu NREGS sum hmanga siamthat tur a ni a, VC leh BDO ten enho nise, sum awm veleh hna tan thei tura beisei a ni. SAI Extension Centre awmna hmuna Tanky siam tum chu endik ni tawhin a him zawk nan hmun hnihah Tanky chu siam nise tih rel a ni bawk.

Kum danga tih thin ang bawkin kuminah Mizoram District tinah kangmei chhuak laka inven dan chungchang mipuite hrilhhriat hun ‘Fire Prevention Week’ hawnna inkhawm chu Lunglei District tan bikin February ni 21, 2014 (Zirtawpni)-ah hman nise tih rel a ni a. He Week hawnna inkhawm hi Saikuti Hall, Lunglei-ah zing dar 7:00 neih a ni ang a, chhun lamah Fire Prevention Awareness Campaign kawngzawh neih a ni bawk ang. Mipuite hnenah kangmei laka inven dan chungchang te, sorkar hmalakna hrang hrang te bakah kangmei tichhuaktu te hrem theihna dan chungchangte chu Lunglei DC-in AIR leh Cable TV kaltlangin thusawina hun hmang se tih rel a ni bawk a ni.