2431/2023-2024

Lawngtlai dated 21st October 2023: Vawiin chawhnu khan Pu Joseph H.Lalramsanga, District Election Officer chuan Lawngtlai district chhung a MLA inthlanna neih tur a inpuahchahna hrang hrang kalpui dan chungchangah thutharlakhawmtute a kawm a. Pu Abraham Beirazi Khithie, Addl. DC, Pi Rochungkimi Khenglawt, PD, DRDO, Pu Denny Lalchhuanawma, EO leh Pu Hmingthanzuala, DIPRO-te an tel a ni. District Election Officer Pu Joseph H.Lalramsanga chuan Election Commission of India-in MLA inthlan kalpui dan tur a hun a bituk angin inthlan kaihhnawih a duty turte Training tha tak a pek an nih thu te, Polling station hrang hrang a hman tur Electronic Voting Machine bithliahna hmasa, 1st Randomisation kalpui a nih tawh thu te tarlangin MLA inthlanna a Lawngtlai district chhung a Assembly Constituency 3-a hming pe lut zat chu mi 13 an nih thu a sawi. Pu Joseph-a chuan Polling station hrang hrangah Assured Minimum Facilities, Tui in tur thianghlim, kawlphetha thlun zawm, inthiarna mumal leh Wheelchair kal theihna tur kailawn a awm theih nan hmalakna kalpui mek a nih thu sawiin Polling Station 181 atanga za zel a 90 ah chuan inthlanna neih hma a ruahman fel hman beisei a nih thu a sawi.

Inthlanna felfai leh thianghlim kalpui a nih theih nan thlithlaitu, General Observer, Security Observer leh Expenditure Observer-te pawh Lawngtlai district an lo thlen tawh thu tarlangin inthlan kaihhnawih a hriatchian duh neite tan an biak pawh theih reng thu a sawi. Inthlanna rintlak kalpui a nih theih nan District Election Officer chuan kawng hrang hrang a inpuahchahnate hriatpuitu ni turin Political party aiawhte leh thutharlakhawmtute chu tel thin turin a chah a, inthlanna chu kan khawtlang, kan ram leh hnam tan a buatsaih a nih angin mipuite pawhin vote thlak ngai pawimawh turin a chah bawk a ni. MLA Inthlanna kalpui tur a Sawrkar hnathawk hrang hrang mawhphurhna neite chuan an mawhphurnate ngai pawimawh tur a chahin, Training-te ngai pawimawh turin leh mahni chanpual mawhphurhna theuhte tha tak a hlenchhuak turin a chah bawk a ni.