Vawiin chawhnu dar 1:00 hian Pu Rodney L. Ralte IAS District Election Officer Mamit chuan tun V/C inthlan tur chungchangah chanchinbu mite a kawm.

Thusawiin Pu Rodney L. Ralte IAS, DEO chuan Mamit District chhungah ADEO 1 leh Observer 5, Election Instructor 8, Returning Officers 86, Presiding Officers 102 leh Polling Officers 250 ruat an nih thu a sawi a, Khaw 7 ah inthlan ngaihlohna (Uncontested) awmin chungte chu Rajiv Nagar II, Mualthuam, Belkhai, Teirei Forest, Damdiai, Hreichuk leh Khantlang te an ni a, V/C seat 25 hengah te hian a awm a ni . A taka inthlang tur khaw 78 awmin V/C member thlan tur zat 307 an nih thu tarlangin Voters 51278 awmin In 17526 a awm bawk a ni.

District Election Officer chuan Mamit District ah hian Sensitive Area 12- Sihthiang, Thaidawr, Zomuantlang, Tumpanglui, Mualthuam, Suarhliap, Tuipuibari, Chhippui, Thinghlun, Kolalian, Damdiai leh Nalzawl te an awm thu sawiin Hyper Sensitive Polling Station kan nei lo a ni a ti bawk.

Tun tum inthlannah hian SEC Mizoram chuan inthlanna dik leh felfai a awm theihnan nasa takin tan a la a, ruahmanna thar siamin Indelible Ink hman te, Postal Ballot siamte, Motor hman dan chungchangte leh Polling Booth chhunga meizuk leh mobile hman khap te a tel thu a tarlang bawk a ni.

Chanchinbu mite pawhin an thil hriatthiam lohte leh hriat duhte zawhna neiin DEO hian a hrilhfiah bawk a ni.

District Election Officer hi Pu P.H. Rualzakhuma DLAO, ADEO leh Officials ten tawiawmin MPF hruaitute he hunah hian an tel bawk a ni.