Vawiin Dt 18.2.2013 hian D.C Conference Hall, Mamit-ah Mamit District Fire Prevention Week chu an Chairman Pu V. Lalremthanga, IAS Deputy Commissioner Mamit District, Mamit in a hawng a, hemi hnu hian District Bawrhsap kaihhruaina-in kangmei venna kawnga hmalak dan tur hrang hrang ngaihtuah zui nghal a ni.

Mamit District Fire Prevention Committee chuan Fire Prevention Week, February ni 18 atanga ni 23 chhunga hmalak dan tur hrang hrang leh kumin thal chhunga ramkang ven dan tur kawng hrang hrang a duang a. Environment & Forests Department-in Mamit Forest Division chhunga khaw 12-a awareness campaign an neih bakah Sub-Hqrs. YMA leh Group Conference neihna hmun apiangah campaign nei tura hmalak a ni a. State Level Committee thutlukna angin District chhunga Lo/Huan leh Leipui neizawng zawngin March ni 15 hma a hal vek turin hriattirna District Level Committee leh Local Administration Department hminga ngenna leh hriattirna siam an tum a, Lo, Huan leh Leipui neitu zawng zawngte meilam tha taka sial turin hriattir an ni bawk.

Kumin hian Chanchinbu a kangmei ven kawnga mipuite hnena zirtirna pek kawngah inelna buatsaih an tum a, lawmman tha tak pek an tum bawk a ni. Fire Prevention Week puala Deputy Commissioner thuchah District puma puanzar a ni dawn a. Mamit District hian kum 2001 leh 2002 khan Ramkang veng tha ber District lawmman an lo dawng zawn tawh a, Kuminah hian he lawmman hi lak leh ngei an tum a ni.

Meeting chuan Mamit to Bairabi Road a Green Mizoram Day a thing phun te PWD kawng siamin a tihchhiat thu an hriattin pawi an ti hle a, PWD hnen ah hian tuna chin ah kawng an siam reng rengin kang thei thil reng reng hla taka paih tur leh kawng sir thing phun tichhe tawh lo turin hriattirna pek nise tih te an rel a ni.

District chhunga ramkang veng tha khua thlan an ni dawn a, chutihlaiin ram tikang nasa khua te chungah action lak tum a ni bawk.

He hunah hian Committee members te an tel tha hle a ni.