No.5485/2020-2021 

Dated Champhai, the 27th September, 2020: Vawiin khan District Sports & Youth Office (DSYO) Champhai bultumin rilru leh taksa hrisel siam kawnga inzirtirna Cardio and Fitness Training Session chu District Jail-ah buatsaih a ni.

Thusawitu Dr. Lallawmkima, DIPRO Champhai chuan DSYO Office bultuma District Jail-a awmte rilru leh taksa hriselna tur ngaihtuaha Cardio and Fitness Training Session buatsaih a ni chu lawmawm a tih thu a sawi a. Tunlai khawvel changkang zelah nunphung lo danglam ve zelin taksa leh rilru hman chen leh hunte pawh a inanglo thluaha, taksa leh rilru hrisel, chhawrtlak
 nei tur chuan hriselna kawngte kan dah pawimawh hmasak angai a, kan zawm tura thate zawm hram hram a ngai a ni, a ti.

Mimal tin atanga intan, chhungkua, khawtlang leh ram hrisel siam turin kan zain kan pawimawh dan a inchena, nang leh kei hian bul kan tan thei a, midangte tan zirtirtu tha tak kan ni thei a, ruihhlo leh a kaihhnawihte bansanin phak tawka ei leh in tha, hriselte dapa taksa sawizawi fo thin a ngai a ni, DIPRO Champhai chuan a ti bawk.

Jail-a awmte chu  lungngaia indawmkun mai lovin taksa leh rilrute ti chak sauh sauha nun bul tha tak tan tum tur leh insiamthatna atana hman tum turin a chah a. Chhungkua, kohhran, khawtlang leh ram tana chhawrtlak leh innghahna tlak nih tum tura fuihin, taksa sawizawi kawnga mithiamte hnen atanga zirtirna pek tur chu ngaithla liam mai lova a taka nunpuia midangte hnena hrilhchhawngtu nih  tum theuh turin a chah nghal a ni.

He hun hi Pu Obed Lalmalsawma, DSYO Champhai chuan a kaihruai a. Pu Zosangzuala, Secretary Champhai District Bodybuilding and Fitness Association in inhmelhriattirna a nei a. Pu R.Lalhmachhuana, President, Champhai District Bodybuilding and Fitness Association hnen atangin fuihna thuchah ngaihthlak a ni a. Fitness trainer te'n Jail a awmte tan Cardio and Fitness Training Session neihpuiin an zirtir a. Pu Lalbulliana, Football Coach, DSYO Office in lawmthu sawiin hun a khar a ni.