1046/2022-2023
Champhai, 24th June, 2022: Damdawi hman khawloh leh dan lova tawlh dona ni 'International Day Against Drug Abuse and Illicit Trafficking' pualin vawiin chawhnu khan MSACS, CDC, PATH, I-TECH leh SHALOM te tangkawp buatsaihin 'Ruihhlo vanga hriselna leh nun tluchhe mek hmachhawn dan' (Addressing drug challenges in health and humanitarian crisis) tih thupui hmangin District Jail Champhaiah inzirtirna hun hman a ni.

He hun kaihruaitu Dr. R. Lianmawia, CMO Champhai chuan damdawi hman sual leh tawhlruk ven nan Champhai District-ah beihpui thlak mek zel a nih thu a sawi. Ramri depa awm Champhai District-ah ruihhlo siamna hmunpui Golden Triangle-a siam chhuahte a luh ruk thin thu leh a kalkawng a nih thute a sawi a. Jail-a hun hmang mekte chu an taksa hriselna ngaipawimawh fo tur leh ruihhlo laka fihlim tum turin a chah a. An chhuah hunah pawh ruihhlo leh a kaihhnawih laka inhnamhnawih a that lohna leh nghawng a neih dante midangte zirtira tlangaupuitu nih tum theuh turin a chah a ni.

He hunah hian Pi Vanlalruatpuii Ralte, Counsellor, Mobile ICTC in thupui a sawifiah a. Pu T. Vanlalruata, Field Mentor, I-TECH in mahnia HIV Test tih dan sawifiahin a entir a. Dr. R. Lianmawia, CMO Champhaiin District Jail hnenah tuizem litre 3000 a hlan a, Pu T. Lalnunsanga, Project Manager, Genesaret Drop-in Centre-in lawmthu sawiin hun a khar a. Hemi hnu hian a duh piang tan a thlawnin HIV Test neih a ni.