3917/2023-2024

Khawzawl, 21st February 2024: Mizoram Cleanliness Competition 2023: Category – II District Headquarters bika Khawzawl Town in lawmman pahnihna a dawn lawm dan tur ngaihtuahin vawiin khan Khawzawl DC Meeting Hall-ah thutkhawm neih a ni a. He hunah hian District Sanitation Task Force member te an tel.

Thutkhawm hi Khawzawl Bawrhsap Pu K. Lalrohlua chuan a kaihruai a, District Urban Development Officer (DUDO) Pu Vabeimozachhi Chozah chuan thutkhawm koh chhan te a sawifiah hnuah rorel tan a ni.

Vawiin thutkhawm hian Khawzawlin District khawpui fai ber dawttu lawmman a dawng chu thil chhinchhiahtlak tak a ni tiin lawm ngei ni se tiin an rel a. Lawmna hunah hian khawtlang hruaitu – Village Council member te, Zirna In aiawh te, Kohhran hruaitute bakah District leh Branch-a tlawmngai pawl hruaitute sawm ni se, District Urban Development Office-in he hunah hian PowerPoint Presentation hmangin faina kawnga Khawzawl thlen chin te, hmasawn la ngaihna lai leh thawhhona tur awm thei te rawn tarlang se tia thu dah a ni bawk.

Thutkhawm hian faina hi nunphung a thanhnan theih thil a nih avangin inzirtirna uar zawka kalpui a tul hlein a hria a. Khawzawl khawpuiin Solid Waste Management Center changtlung tak a neih hunah mipui ten bawlhhlawh thliar an lo nunpui hmasak theihna turin, bawlhhlawh tawih thei leh thei lo thliarna in tinin an neih theih nan hmalak ni se tiin a rel bawk.