3965/2022-2023

Lunglei the 23rd March, 2023 – District Level Adhoc Managing Committee for Saikuti Hall chu vawiin khan an Chairman Lunglei DC Pi Ramdinliani, IAS kaihhruaiin DC Conference Hall-ah an thukhawm.

Meeting-ah hian Saikuti Hall dinhmun tlangpui leh a enkawl dan chungchangte leh hmalak tul te chipchiar taka sawiho a ni a. National Institute of Electronics & Information Technology (NIELIT), Lunglei ten Saikuti Hall-ah Study Centre din an rawn dil chu ngaihtuah ho a ni a. NIELIT, Pukpui hi Lunglei khawpui atanga a hlat avangin zirlaite tan pan a harsa a, Saikuti Hall-ah Study Centre din anih theih chuan zirlaite tan pawh hmasawnna lawmawm tak ani dawn a ni tiin Managing Committee chuan an dilna hi pawm sak tha an ti a. He Study Centre dinna tur hi uluk taka en ho tur niin Saikuti Hall hmang tu dangte tana hnawksak lo tura hmun rem ngaihtuah ni se tih Committee chuan a rel a ni.

Saikuti Hall chei that leh tih changtlun kawngah pawh hmalak a tul takzet thu Chairman Lunglei DC Pi Ramdinliani chuan a tarlang a. Saikuti Hall leh Circuit House renovation atan PWD hotute chu NEC leh SASCI a thehluh tur project losiam fel thuai turin a hriattir bawk a. LMC inthlan neih hma in Saikuti Hall chu uluk taka thenfai ni se tih pawh rel niin March ni 27, 2023 Thawhtanni ah hian a thenfai hnatlang neih ani dawn a ni.

Vawiin meeting-ah hian District Level Adhoc Managing Committee member-te Project Director DRDO, SDO (S), SRO Art & Culture, DEO, SDPO, DIPRO, EE PWD, BDO, DLAO te an tel a ni.