Vawiin hian Serchhip District Level Co-Ordination Committee on Civil Registration System of Births & Deaths te chu an Chairman Pi Sangchhin Chinzah, Bawrhsp ni bawk hovin an thukhawm a. Birth & Death Registration Report te thlir hovin Certificate lakchhuah kawnga mipuiten harsatna an tawh thin te an sawiho.

Chairman Pi Sangchhin Chinzah chuan, nun kawng tinreng deuh thaw ah sawrkarin a mipuite hamthatna leh hmasawnna a ngaihtuah a. Khua leh tui dik takte chauhvin sawrkar hmalakna an chhawr theih nana mipuite dik taka chhinchhiah hi hna pawimawh a ni, chutiang hnathawktute zingah Register of Birth & Death te an pawimawh em em a. Birth Certificate mi diklo hnena pekchhuah palh hian nasa takin hnam leh sawrkar pawi a khawih hlauh thei a ni, a ti.

Vawiin meetingah hian kum 2018 leh 2019 kum chanve report tlangpui pharh a ni a; 2018 chhung khan Register of Birth & Death te kal tlangin Live Birth Register 736, Death Register 318 a awm a. DRO Office atanga Non-Availability Certificate hmanga Birth Certificate pekchhuah 214 leh Death Certificate pek chhuah 9 awmin DRO atang veka Birth Certificate Re-Issue 449 leh Death Certificate Re-Issue 17 a awm a ni. Kum 2019 kum chanve (Jan –June) chhung hian Register of Birth & Death te kal tlanga Live Birth Register 347 leh Death Register 145 a awm tawh a, DRO Office in Non-Availability Certificate hmanga Birth Certificate a pek tawh chu 148 niin, Death Certificate 11 a pe tawh a. DRO atang veka Birth Certificate Re-Issue hi 278, Death Certificate re-Issue 14 a ni tawh bawk.

Meeting ah hian Department in district chhunga khaw thenkhat te record bu a hmuhchhuah mai loh te chungchang sawiho a ni a. Heng record bu hmuhchhuah loh te huam chhunga piang leh thi, Certificate re-issue rawn dilte chu awlsam leh tlawm zawka pek an nih theih nan thuneitu sang zawkah ruahmana lo siam tura ngen ni se, tiin a rel a ni.

Committee chuan, Birth Certificate inpek chhuah kawngah kohhran te, tlawmngaipawlte, Village Council te chu khua leh tui dik tak te chauh lehkha rawn siam sak thin turin a thara ngen leh ni se, Register of Birth & Death te pawh an hnathawh pawimawh zia leh, tisual lui duhte tana a pawi thui theihzia te a thara inhrilh hriat leh ni se, tiin a rel bawk a ni.

Vawiin meeting ah hian members te an kal kim a ni.