459/2022-2023
Kolasib dated 11th May 2022: Vawiin chawhma khan DC Conference Hall, Kolasibah Sawrkar laipuiin a ni 5, June, 2022 hmaa vawi khat hman plastic (Single Use Plastics) zawrh/hman tih tawp a nih theih nana ruahmanna a siam bawhzuiin District Level Committee on Single Use Plastic, Kolasib District chuan thutkhawmna an nei a. He hun hi Pu John LT Sanga, Deputy Commissioner-in kaihruaiin ni May ni 17 leh 21, 2022 hian khaw chhung bazar hmun ahte vawi khat hman Plastic hmang lo tura inzirtirna kalpui an rel.

Ram leilung, ramsa leh tui hnuai a thil nungte nasa tak a tichhe theitu vawi khat hman Plastics (Single Use Plastics) zawrh leh hman tih tawp a nih theih nana hmalakna hmasa atan District Level Committee chuan Sawrkar pisa hmunte chu ‘Single Use Plactic Free’-a puan theih tur a hmalak nise a ti a, khawtlang leh kohhran tin hruaitute hnenah pawh Single Use Plastics hmang lo tura ngenna tih chhuah an rel bawk a ni. Vawi khat hman Plastics tih tawp a nih hun a harsatna a awm loh nan Kolasib district chhunga Kuhva hnah leh hmanraw dang atanga thleng, fian leh no siamna khawl awmte zirchianna neih rel niin Bazar nana hman nawn theih bazar ip hman intihhmuh leh sarang hmang lo tura inzirtirna pawh Bazar hmun ah leh Gram sabha-ahte neih nise tih an rel a. Heng rawtna hrang hrangte chak tak a bawhzui a nih theih nan endik leh viltu tur ruat nise tih rel a ni bawk.

Vawiin thukhawm chuan khawchhung hmun laili lai a ‘Plastic Collection Centre’ neih belh dan tur leh Plastic Bailing Machine, Thingdawl leh Solid Waste Management Centre-a awm te tangkai zawk a hman dan tur an sawi a. Sawrkar leh mipui thawhhona a pawimawh dawn avangin Committee member-ah khawtlang leh tlawmngai pawl hruaitute ruat tel nise tih an rel bawk a ni. Single Use Plastics hman tih tlem a nih theih nan Divisional Forest Office, Project Director, DRDA, District Urban Development Office leh District Local Administration Office hmalak tawhnate ngaihthlak a ni.