Vawiin hian Serchhip Horticulture Division in District Level Horticulture Crop Exhibition, Serchhip Town Hall a a buatsaih chu Bawrhsap Dr. Lalrozama, IAS chuan a khar.

A kharna inkhawm tawi, Pi Zosiamliani, DHO Serchhip kaihhruaiah Dr. Lalrozama chuan, Serchhip District ah sawrkar leh kuthnathawktute thawh hona a tha hle a, a lawmawm tak zet a ni, a ti a. Kuthnathawktute thawh rah pho chhuaha, an hlawhtlinna mipui tam zawkte hmaa hmuh theiha dah chhuah fo chu tha hle a a hriat thu leh, exhibition hian tam zawk leh tha zawka tharchhuah duhna a thawktute rilruah a tuh a beisei thu a sawi a ni.

Pu K. Lalduhawma, Deputy Director, Horticulture Department pawhin thusawiin, Mizorama pangpang chingtute tharchhuah chu Japan ah te, Middle East lamah te thawn chhuah chhin a nih tawh thu sawiin, a hralhna lamah harsatna lutuk a awm loh thu a sawi a, an duh zat kan thawn theih loh avangin kan buai thin zawk a ni, a ti a. Foreign a thawn kher lo pawhin India ram chhungah kan thar chhuah ang te hralhna chu a awm reng thu a sawi. Chutihlaiin pangpar hrisel leh him dam tak chauh a hralh a kal thu a sawi bawk.

Pi Lucy Zaithangpuii, HDO, Serchhip Division chuan technical report a pe a, he Exhibition hi Missions for Integrated Development of Horticulture sum hmanga buatsaih a ni a, District dangah pawh neih vek tura hmalak a nih thu leh Serchhip District bika neihah hian thlai chingtu mi 109 ten thlai thar chi hrang hrang 362 ean entir thu a sawi a ni. He exhibition ah hian lawmman chi hrang hrang siam a ni a, Crops bikah chi 8, Vegetables ah chi 12, Flowers ah chi 10, flowers arrangement ah chi 4.

Heng then hrang hranga lawmman dawngtute hnenah hian khuallian Dr. Lalrozama hian lawmman a sem a, a tel zawng zawngte hnena lawmman pawh Pu K. Lalduhawma, Deputy Director hian a sem bawk a ni.