Vawiin khan DC Conference Hall-ah Champhai Addl. DC Pu Zoengsanga kaihhruaina in District Level NLUP Implementing Committee neih a ni a, he hun hi State NLUP Implementing Board Chairman Pu JH Rothuama'n a hmanpui a, Chairman hi Chief Media Officer (NIB/I & PR) Pu David Thangliana leh Editor Zozam Times Aizawl ten an tawiawm.
Champhai Addl. DC & District Level NLUP Implementing Committee Chairman Pu Zoengsanga chuan Champhai District chhungah NLUP hamthatna dawngtu chhungkaw 17,544 an awm mek thu leh heng hamthatna dawngtute hnenah Line Department 8 atangin First leh Second Phase sem zawh tawh anih thu leh Third leh Fourth phase kalpui mek pawh engemawzat pek tawh anih thu tarlangin, sorkar in VLNC a dinthar tak vang leh he Committee dinthar hian hma a lak zui dawn vangin sorkar lam ngaihchan mek anih dan a tarlan bakah Champhai District chhung Line Department 8 zingah District Industries Deptt. leh Fisheries Deptt.in Vehicle anla neih loh thu a sawi a. Thawhtu indaih lohna avang leh Contingency fund a tlem deuh vangin Field visit-na kawngah harsatna an tawh thin thu a sawi.
State NLUP Implementing Board Chairman Pu JH Rothuama chuan NLUP chu State Flagship Programme anih angin Mizoram a chhungkaw khawsak harsate khaichhuahna tura chak taka hmalak anih thu a sawi a, he Programmetih hlawhtlinna kawnga Line Department 8 te hnathawh dan chu fakawm atih thu leh theih tawp chhuah chhunzawm turin a sawm nghal.
Pu JH Rothuama chuan NLUP hi MIzoram khawthlang lamah chhungkaw tam takin an hlawhtlinpui mek thu sawiin, kumtin loneih (Jhum Cultivation) bansanin huanhlun tur an siam mekah thlai kumhlun an ching mek a, chhungkaw tam berten dinchhuah nan an hmang ngei dawn thu tarlangin, tunah hian Third phase kalpui chhunzawm nan Rs 370 crores ruahman anih thu leh Implementing lam aiin Monitoring lam hawi a hmalakzui anih tur thu a sawi a, Engineer te rawnin Agriculture leh Horticulture hamthatna dawngtute tan Link road laih tawh thin nise tha a a hriat thu a sawi bawk.
Kumin hian kumtin lo neih ramtheh (Jhum Cultivation) tlem khuate hnenah lawmman sem anih dawn thu leh nakum atangin Thingtlang khua, Tuihna leh ramngaw (reserve forest) humhalh thate hnenah lawmman siam anih dawn thu a sawi a. NLUP hmala tha leh chhungkaw hlawhtling, entawntlakte mipui hriat a pho chhuah chu thil pawimawh tak anih thu a Pu JH Rothuama chuan a sawi bawk.
Pu JH Rothuama chuan NLUP hamthatna dawngtute thar chhuah sawngbawlna turin sorkarin Zawlnuama Ice Plant ( Cold Storage) Sangha dahthatna tur leh Red Oil palm herna khawl Rs 14 Crores vel senga sak mek anih thu a sawi.
He meetingah hian Line Department hrang hrangten Champhai District chhunga an hmalakna tarlangin, hlawhtling leh zuala NLUP kalpui anih theihna tur leh harsatna an tawh mek chungchang pawh tarlan a ni bawk.
