Ni li (4) awh tur District Level PYKKA Sport 2010 chu vawiin khan Mamit GSA Playground-ah tan a ni a. He sport hi Pu A. Biaklawma, Additional DC Mamit in a hawng.

Hawnna inkhawmah thu sawiin Pu A. Biaklawma Khuallian chuan thil engkim mai hian chin tawk (limit) a nei thin a. Infiamna ah chuan chin tawk a awm lo a ni tiin, chumi atana inbuatsaihna tha ber leh pawimawh ber chu 'human investment' hi a ni a ti bawk. Material investment tha taka kal pui tur pawhin mahni kan invest that a pawimawh thu sawiin, chutianga invest na dang hrelote chuan an damchhung khawsak relna kawngah pawh harsatna an tawk thin a ni a ti bawk. Khuallian chuan khawvel changkannna in a ken media lam hmasawnna sawilangin heng atang hian a chhe lawm leh maksak lam mai entawn lova a tha lam leh hmasawnna an nih dante uluk taka ngaihtuah chunga entawn zawk turin infiammi kalkhawmte a chah a ni.

Pu Mickey C. Lalenkawla, Secretary Mamit District PYKKA chuan report pein PYKKA Sport ah hian Football (Mipa leh Hmeichhia), Volleyball (Mipa leh Hmeichhia), Hockey (Hmeichhia), Boxing (Mipa leh Hmeichhia), Taekwondo (Mipa leh Hmeichhia), Badminton (Mipa leh Hmeichhia), Table Tennis (Mipa leh Hmeichhia) bakah Discuss throw, Shotput, Javelin throw, Long Jump leh Athletics-ah 100m, 200m, 400m, 800m, 1500m te inelna hi buatsaih a nih dawn thu a sawi.

Cindy Lalhmangaihsangi'n infiammite aiawhin thu a tiam bawk.

Hawnna inkhawm hi Pu V.L. Remliana SDO(Sadar) Chairman Mamit District Level PYKKA competition 2010 in a kaihruai a ni. He Mamit District PYKKA Sports Competition ah hian Block level a inel niin, Block champion in Rs. 40,000/- leh Trophy, pahnihna in Rs. 24,000/- leh Trophy leh pathumna in Rs. 8,000/- leh Trophy an dawng dawn a ni.

He PYKKA Sports ah Zawlnuam Block chu a len tham avangin block hnihah then niin hemi bakah hian, West Phaileng leh Reiek Block atangin naupang infiammi kum 16 hnuailam 276 leh officials 80 vel an tel a ni.

Tun tum District Level PYKKA Competion neih rual hian Women Sport Competition pawh buatsaih nghal a ni bawk.

Attachment

  • Loading attachment...