Vawiin hian Lawngtlai DC Conference Hall ah Lai Autonomous District Council 10 na General Election atana inbuatsaihna kal zelah District Level Standing Committee chu Chairman Pu J. Hmingthanmawia, District Election Officer hovin an thukhawm a, inthlanna lo awm tura thil pawimawh chi hrang hrangte an sawi ho.

He meeting ah hian Election nei na tura tihtur hmachhawp awm te a indawta sawifiah a ni a, Model Code of Conduct for Autonomous District Council pawh chipchiar taka chhiarchhuah niin District Election Officer hian sawifiahna a  nei nghal a. Political Party, Official leh tlawmngaipawl aiawhte pawhin an hriatchian duh ang ang te an zawt fiah bawk a ni.

Hei bakah hian Lawngtlai Bazar Veng ten an Polling Station hman thin pahnih, Govt Region Higher Secondary School leh Bazar Veng Middle School te chu a panna awlsam leh hmunhma zau zawk pahnih Dokulha Hall leh Bazar YLA Hall a thlak an dilna pawh ngaihtuah niin an dilna hi State Election Commission ah thlen nise, tiin an rel a ni.

Vawiina meetingah hian Lawngtlai SP Pu Sanglura, LADC CEM Pu V. Zirsanga, LADC Executive Secretary Pu H. Lalramenga te bakah bial hrang hranga tana Assistant Returning Officer atana ruatte leh Political Party aiawh leh tlawmngaipawl aiawhte an tel a ni.

Tar lan tawh thin angin LADC ah hian MDC elect Seat 25 a awm a, polling Station 103 awmin vote thlak thei mihring 45757 an awm mek a ni.  State Election Commission ruahman angin Vote hi 26.11.2015 khian thlak a ni dawn a, 28.11.2015 ah vote hi chhiar tur a ni thung ang.