Vawiin hian Lawngtlai Bawrhsap Office Chamber ah Lawngtlai District Task Force on Immunization chu an Chairman Pi A. Muthamma, IAS , Lawngtlai Bawrhsap ni bawk hovin an thukhawm a, tun thla ni 7 - 14 April a neih tur Mission Indradhanush kalpui dan tur leh tun thla vek ni 25 April a Zenghri danna pek beihpui thlak (National Switch Day) kalpui dan tur an rel.

Pi A. Muthamma chuan, naupang hnena Vaccine pek that chu an dam chhunga tana pawimawh leh ram leh khawtlang tana thil tangkai a nih avangin Lawngtlai District chhunga naupang zawng zawng ten kokim takin la ngei se a duh thu a sawi a. Chutianga kokim taka an lak theih nan chuan District chhunga tlawmngaipawl zawng zawngte chu thawhpuiah sawmin, Health Worker mahni bial chhunga target tlin te hnenah lawmpuina thilpek engemaw a siam sak tur thu a sawi bawk.  Mi thenkhat ten hriatlohna avanga vaccine lak an lo hnial palh a hlauhthawn thu sawiin Pi Muthamma chuan, inzirtirna leh inhrilhhriatna tam zawk nei tura ruahmanna siam a nih tur thu a sawi a ni.

Sawrkar laipuiin Zenghri danna a la kalpui zel chhan sawifiahin Dr. Zothanpari Chhakchhuak, District Immunisation Officer chuan, India ram chu Zenghri awm tawh lohna ramah WHO in puang mah se kan thenawm ram thenkhatah he natna hi a la awm avangin la inkaichhawn palh theih a ni a, chumi ven nan chuan he Vaccine hi sawrkar chuan a la kalpui zel a ni, a ti a. Chumi beihpui thlakna kal zelah Lawngtlai District ah pawh 25.4.2016 hian Trivalent Oral Polio Vaccine leh Bivalent Oral Polio Vaccine pek runpui neih tura ruahman a ni.

Mission Indradanush bikah hian tun ni 7.4.2016 a kalpui tan leh tur hi Phase III na Round 1 na a ni dawn a ni 13 thlenga kalpui tur niin Lawngtlai District biakah chuan he Round ah hian Routine Immunisation neih theihlohna hmun khaw 70 ah kalpui tur a ni ang.