District Level Vigilance and Monotoring Committee chu nimin khan Committee chairman Pu Ronald Sapa Tlau hovin DC Conference Hall, Mamit ah an thukhawm.

Pu Ronald Sapa Tlau, MP (Rajya Sabha) chuan District Officer hrang hrang lo kal khawm te chu sum hmuh ang ang a tha thei ang bera hmang tur leh rawng an bawlsak mipuite tana theihtawp chhuah turin a fuih a, District Level Vigilance & Monitoring Committee ngai pawimawh a lokal khawm Bialtu MLA te leh Committee Member te chungah lawmthu a sawi a ni.

Meetingah hian Pu John Rotluangliana, Mamit Bialtu chuan Official te chu Sawrkar hmalakna hrang hrang te chu MLA te nen inpawh taka sawiho thin ni se, hmasawnna hna thawh kawngah chak zawka hmalak a nih a beisei thu sawiin hemi kawngah hian engtik lai pawha biakpawh a in huam thu a sawi bawk.

Pu Lalrobiaka Dampa Bialtu chuan Dampa Constituency huam chhunga NGO’s leh Sorkar hnathawkte te chu inpawh taka hnathawk tlang turin leh Sorkar hnathawkte mahni hnathawhna hmuna mipui rawngbawl chu Pathian rawngbawlna a ngaia chhuahsan tam lo turin a fuih a ni.

Nimin thutkhawmah hian Central Scheme hrang hrang MGNREGS, PMGSY,IWMP, NRDWP,SBM,NSAP leh RGGVY hmanga hnathawh dan leh hmalakna te thlir ho a ni a, Pu R. Vanlalsawta, Project Director DRDA Mamit in kum 2015-2016 chhung in MGNREGS ah Rs 1600.909 lakhs dawn a ni a, hemi hmang hian chhungkaw 20361 te tan ni 34 inhlawhna pek a ni tawh thu a tarlang a, mipui inhlawhna a tan hian tha 690000 sen a nih tawh thu a sawi bawk. IAY Scheme hnuaiah hian target 121 neiin hnathawhna tur sum dawn a la nih loh avangin hmalak a la ni lo thu leh IWMP hnuaiah Project paruk (6) awmin Project tina sum hmuh leh hman dante sawi lan a ni.

Meetingah hian Mamit Bialtu MLA Pu John Rotluangliana, Dampa Bialtu Pu Lalrobiaka, Pi Lalbiaksangi Deputy Commissioner, Mamit leh Committee Member te an tel tha hle a ni.