4175/2025-2026 

Dated Kolasib the 27th January 2026 : Vawiin chawhma dar khan Govt. Kolasib College-ah District Research Office Kolasib District buatsaihin Annual Meeting Cum Trainning neih a ni a, he hun hi Pu Robert C. Lalhmangaiha DC Kolasib chuan khuallian niin a hmanpui.

Khuallian Pu Robert C. Lalhmangaiha DC Kolasib chuan thu sawiin, Registrar kal khawmte chu Kolasib District chhunga inchhiarna atan thawktu pawimawh tak an nih thu leh he inchhiar leh inchhinchhiahna kawngah dik tak leh rinawm taka huaisenna nen an hna chu thawk turin a chah.

DC chuan Registrar-te chu Sawrkar hnathawk nih mai bakah Pathian rawngbawltu dik tak an nih thu sawiin, Mizoram hian ram dang, hnam dang min hnaihtu an awm nual a, hei vang hian Mizoram mi nilo Birth certificate lo pe awm thin hian buaina an thlen fo avangin dik tak leh fimkhur taka hna thawk turin a chah bawk.

Kum 2025 August-September chhung khan District Research Office, Kolasib chuan Data on Socio-Economic Survey a buatsaih a. Kolasib District chhunga khaw 60 ah data lakkhawm a ni. Data-a a lan danin Kolasib District-ah mi 1,12,259 (68.49%) an cheng a, heng zinga mi 46,758 (54.37%) chu thing-tlang a cheng niin; khawpuia cheng mi 65,501 (75.24%) an awm. Ziak leh chhiar thiam (Literacy rate) hi 98.05% a ni.

Civil Registration System on Births & Deaths, DRO Kolasib-in a chhinchhiah danin kum 2025 January - December chhung khan Kolasib district-ah nau piang mi 1,319 (mipa 685 leh hmeichhia 634) an awm a, Birth Rate hi za zelah 11.74 a ni. Hemi hun chhung hian mitthi 520 (mipa 347 leh hmeichhia 153) an awm bawk a, Death Rate hi za zelah 13.54 a ni bawk.

Thih chhan langsar zual zingah Cancer vangin mi 99 an thi a, Lung na/Lung tha lo (Heart Attack/Heart failure) vangin mi 47 an thi bawk a. Asthma vanga thi mi 36 awmin, Kal tha lo (Kidney disease) vangin mi 21 thi an awm bawk.

DRO Office Kolasib hian thil man (price) hrang hrang, heng consumer goods, intermediate goods chi hrang hrang wholesale price item 87 leh retail price 189 te kartin (weekly)-in Kolasib District-a bazaar hmun 5 atangin a lakhawm thin a, chung data chu Ministry of Statistics & Programme Implementation, Govt of India ah Inflation (thil man sang) tehna atan hman thin a ni.

Heng bakah hian Daily Meteorological Data (rainfall, temperature, windspeed, humidity) te a lakhawm thin bawk a. Heng data te hi Directorate of Science & Technology kaltlangin Indian Meteorological Department-ah official data atan hman a ni. Index of Industrial Production (IIP) data, Agriculture Census data leh Economic Census data (Socio-Economic Survey) te kum tin in a buatsaih thin bawk.

Pu Jerome Lalzawna, Kolasib Hmar veng chuan kum 15 tha tak leh rinawm taka Registrar (RBD) (1999-2008 leh 2019-2025) hna lo thawk tawh, Kum 2025-a a Superannuation Pension hriatreng nan leh chawimawina'n Rajistraar Vishisht Seva Puraskaar (RVSP) Award Citation 2026 chu hlan a ni bawk.

Training-ah hian Kolasib District chhung khua/veng hrang hrangah Registrars mi 52 awm zingah mi 50 an kal thei a, heng kal khawmte hi Pu J. Ramdinmawia Inpsector of Statistics leh Pi H. Lalchhuanmawii Inpsector of Statistics Economics & Statistics, Mizoram ten zirtirna an pe a ni.