3781/2023-2024

Dated Serchhip, the 12th February, 2024: Vawiin chawhma khan “33rd District Road Safety Month 2024” chu Serchhip Bazar tualzawlah hawnna inkhawm buatsaih niin Serchhip Superintendent of Police, Pu MS Dawngkima MPS chu khuallian a ni.

Khuallian chuan kawngpui hmangtu chu mi chi hnih an awm thu sawiin, lirthei khalhtute leh ke-a kal nana hmangtu te an nih thu a sawi a. Lirthei a pun zel avang leh kan tana awlsamna thlentu a nih ruala harsatna min thlentu a nih theih avangin kawngpui hmangtute lirthei laka vanduaina kan tawh palh theih laka fimkhur a tulzia inzirtirna atan ‘Road Safety Month’ hi hman a tul thu a sawi a. Ram changkang tawh (Developed Country)-ah chuan lirthei te tam mah se mipui ten Dan an zawm that avangin chhiatna thleng a tlem thu leh ram thanglai (Developing Country)-ah erawh chuan Dan zawm kan ngaih-thah thin avanga chetsualna leh vanduaina thleng a tam thin thu a sawi a. Serchhip Police report atanga a lan danin Serchhip District-ah kum 2021 khan lirthei chetsualna thlengah nunna chan mi 7 awmin kum 2022-ah mi 10 an awm thu leh nikum-ah erawh an awm loh thu a sawi bawk. SP chuan, Khawvela thalai te zingah thihna thlentu tam ber chu lirthei accident vang a nih thu te, Accident/Chhiatna thlentu tam ber - Over Speeding a nih thu leh lirthei khalhtuten Driver Seat a an chuan/thut chiah hian Dan leh hrai chi hrang hrangin a phuar nghal a ni tih hre thar leh tur te, nu leh pa te pawhin an tu leh fa kum tlinglo te chu lirthei khalhtir lo turin a chah nawn leh a, he Road Safety Month hman a nih chhung hian mitinten fimkhurna leh hawihawmna vawng reng tura chah thar lehin , ‘33rd Serchhip District Road Safety Month 2024’ chu a hawng a ni.

Serchhip a “33rd District Road Safety Month 2024”hawnna inkhawmah hian Serchhip District Transport Officer, PC Biakrikhuma pawhin thusawiin, lirthei khalhtute chu ruihtheih thil laka fihlim turin a chah a. Lirthei chungchanga Dan leh hrai hrang hrang te, Motor Permit, Lirthei Documents leh chhiah chungchangte a sawi bakah Lirthei hman(Hire) na Rate siam leh ennawn chu State Transport Authority kut a nih thute a sawi bawk.

He hun hi ZDU Serchhip Hqrs President Pu H Malsawma’n a kaihruai a. Serchhip a Lirthei Pawl hrang hrang atanga he “33rd District Road Safety Month 2024” hawnna inkhawm tawia kal tha te hnenah lawmman sem a nih hnuin, MVI inspector Pu Lalrohlua’n lawmthu sawiin programme hi a khar ani.

Serchhip a “33rd District Road Safety Month 2024”hawn hnu hian Serchhip Traffic Police, MVI & Enforcement Duty te leh Serchhip Police tangkawpten Serchhip khawpui hmun hrang hrangah Lirthei endik hna an kapui tan nghal a ni.