No.5566/2020-2021

Dated Serchhip, the 29th September, 2020: Vawiin hian Serchhip District Sanitation Task Force te chu an Chairman Pu Kumar Abhishek, IAS hovin an thukhawm a, kumin Faina Hapta hman dan turte, Mizoram khawpui fai inelna atana tan lak dan turte leh India ram khawpui fai inelna Swachh Survekshan, 2021 atana inbuatsaih chhoh dan turte an rel.

Member Secretary Pi Vanthangpuii, DUDO chuan Faina Hapta hman dan turte, Mizoram khawpui fai inelna kalpui dan tur te, Swachh Survekshan 2021 kalpui dan turte kimchang taka a sawifiah hnuah members ten hmalak dan tur an rel zui a. Faina Hapta hawnna inkhawm hi sawrkarin punkhawm a phal sak chin chhungah hman a rel a, hapta hman chhung hian Serchhip Town, N. Vanlaiphai Town leh Thenzawl Town chhunga Village Council zawng zawngte chu punkhawm phal zat zela insemdarha faina hnatlang nei vek tura tih a ni. Hapta chhunga fai inelna, sawrkar pisa inelna endik turin MJA, School leh Institution inelna endik turin MZP, Village Council inelna endik turin YMA, Bazar endik turin Jt. VC leh Hospital & Restaurant inelna endik turin MUP leh MHIP te ruat an ni a. Village Council fai inelna bik hi Hapta atanga tanin nakkum January thla thleng kalpui tur a ni a, endiktute pawhin he hun chhung hian vawi thum endikna an nei dawn a ni. Tin, khawpui fai inelna atana inbuatsaihna tur chi dangte pawh chipchiar taka sawi a ni a, faina lama thawk tha mipa leh hmeichhia thlan chhuah tur chi Jt. Village Council ten lo ngaihtuah se tha tih a ni a, District chhung khawpui pathumah chhung tinte chu bawlhhlawh bawm pathum (tawih theih, tawih thei lo leh Hriselna atana hlauhawm) neih kalpui tan tawh nise tha tih a ni. He kalphung hi nikum lamah Serchhip khawpuiah Pilot Project ang deuhvin chhungkaw thlan bikteah kalpui chhin a ni tawh a, kumin atang chuan a theih dan ang anga chhungtinin kalpui tum tan ni se tiin a rel a ni. Village Council tinte chu thlatin vawi khat tal faina hnatlang nei tura beisei an ni a, an huam chhungah Mizoram Khawpui Fai inelna thuziak kumhlun (Permanent Hoarding) pakhat tal nei vek tura beisei an ni bawk.

Hengte bakah hian Mizoram khawpui fai inelna atana hmalakna tur pawimawh dangte leh Swachh Survekshan, 2021 atana hmalakna tur pawimawh dangte pawh sawi ho a ni.

Meeting ah hian District Sanitation Task Force Member te, Pu Kulo Thungan, IAS te, Pu Malsawmtluanga, MCS, PD, DRDA te Thenzawl SDO, Pi Dorothy Muansangi, MCS, N. Vanlaiphai, SDO te leh Serchhip khawpui chhunga VC tin aiawhte an tel a ni.