No.52/2019-2020

Vawiin hian DC Conference Hall Serchhipah District Supply Chain Management Committee chu an Chairman Pu H. Dolianabuaia, District Magistrate hovin an thukhawm a, Serchhip District chhunga mipuite tana nitin mamawh lakluh leh pekchhuah kawnga hmalak dan tur chungchang an sawi ho a ni.

District chhunga dawrkai lian ten nitin mamawh an la kawl dan dinhmun atangin tun dinhmunah chuan hlauhthawn tur a awm lo niin a lang a, uluk taka vilzui a, a tul ang zel a hmalak chhunzawm zel nise tih a ni a. Eirawngbawlna Gas pawh vawiin hian Truck trip 1 a lo thleng a, trip 2 dang lo thleng leh mai tur a awm thu ngaihthlak niin, veng tinah a inchhawka sem kual dan ngai anga hmatiama sem leh zel nise tih a ni bawk.

Serchhip khaw chhungah thei rah chawk luh dan tur chungchang ngaihtuah niin Local Task Force kaltlanga lakluh dan dap nise, Baktawng, Khumtung leh Khawlailung atangin Balhla, Thingfanghma leh thei rah dangte chawkluh tura ruahman a ni bawk.

Tin, Serchhip Mat phaia thlai tharte chu Mizoram hmun hrang hranga thawnchhuah mek zel niin, Zikhlum, Bawkbawn leh Tomato te chu man to uchuaka hralh an awm thu report ngaihtlak a ni a. Heng thlai tharte hi MIZOFED in an la chhawng a, MIZOFED hian Zikhlum kg 1 – Rs. 30, Bawkbawn kg 1 Rs. 25 in an la a, an hralh zui dan hi helamin an hriatpui zui tawh loh thu sawi lan a ni bawk. Thlai tharte hi Thawhtanni leh Zirtawpni ah te Aizawla thawn thlak thin niin, hmun danga atanga la turte tan Nialaini ah lak tir nise tih a rel bawk a ni.

He meetingah hian Pu Vanlalhmachhuana, BDO, Member Secretary, Pi C. Lalduhzuali, SDO(Sadar), Pu PC Laltanpuia, Addl. SP bakah Committee Memberte an tel tha hle a ni.