Vawiin khan District Vigilance & Monitoring Committee, Lunglei District chu Chairman Pu C.L.Ruala, MP (Lok Sabha) kaihhruaina hnuaiah Lunglei Circuit House Conference Hall-ah an thukhawm a. He Committee-ah hian DVMC Co-Chairman Pu Lalhmingliana, MP (Rajya Sabha), HPC Vice-Chairman Pu S.Laldingliana, Lunglei West MLA PU Chalrosanga Ralte, Lunglei DC Pu V.Sapchhunga bakah sorkar laipui ruahmanna kalpui mek leh a kaihhnawih Department officials-te an tel a ni.

District Vigilance & Monitoring Committee Chairman Pu C.L.Ruala chuan member kalkhawmte chibai bukna leh lawmna thu sawiin kum 5 kalta chhunga an hmalaknate thlirho theihna hun tha an nei thei chu lawmawm a ti a. Sawisel emaw thurawn an pek emaw te chu rilru nat nan hmang lova, a hma aia tanlak nan hmang turin a fuih a ni. Sorkar hnathawkte inpekna leh thawhrimnaah lawmthu a sawi bawk a ni.

Committee Co-Chairman MP (RS) Pu Lalhmingliana chuan sorkar scheme hrang hrang atana sum lo lut hmanga hnathawh thlirletin a lungawi thlak hlea a hriat thu a sawi a. Lunglei District chhungah hmasawnna tam tak hmuh tur a awm a ni, a ti. Mizoram hmasawnna tura sorkar officers-te lo chu rin tur an awm loh thu sawiin Pu Lalhmingliana chuan ram leh hnam atana thawk an ni tih leh mipuite pawh kawng dik kawhhmutu tur an ni tih hre reng turin member-te a chah a ni.

Lunglei D.C. Pu V.Sapchhunga pawhin thu sawiin District Vigilance & Monitoring Committee Chairman leh Co-Chairman ten Lunglei hmasawnna tura an thahnemngaihna bakah mipuite sukthlek dan tur thleng pawh ngaihtuah tela, ram hmasawnna tur kalpui danah an kaihruai thiam thin chu a lawmawm hle a ni, a ti.

Vawiina DVMC thukhawm chuan sorkar laipui atanga scheme hrang hrang atana sum ruahman leh hnathawh dante thlirho a ni a, Lunglei District chhunga heng Central Scheme kalpui mek-te dinhmun tlangpui chu hetiang hi a ni :

1. Mahatma Gandhi National Rural Employment Guarantee Act (MGNREGA) :  Kum 2013-2014 chhunga hman atan Cheng nuai 3796.711 hmuh a ni a. MGNREGA hnuaiah hian Job Card 33668 siam a ni tawhin, Ni 57 hnathawh tawh a ni. MGNREGA hnuaiah a zavaiin Work 203 thawh a ni a, chung zingah 57 chu zawhfel ni tawhin, 146 chu thawh mek a ni thung.

2. Indira Awaas Yojana (IAY) :  Kum 2013-2014 chhung atan Cheng nuai 353.041 dah a ni a, chenna in neilote tana chenna tur in 407 sak a ni.

3. Ministry of Drinking Water & Sanitation hnuaiah PHE katlangin Lunglei District chhungah tuilakna tur khaw 5 thlan niin hna kalpui mek a ni. Toilet pawh engemawzat sak tawh niin sakbelh zel tum a ni bawk.

4. Ministry of Rural Development hnuaia National Social Assistance Programme (NSAP) kaltlangin Tar 5227, Hmeithai 333 leh Rualbanlo mi 129 te tanpuina pek a ni.

5. Lunglei District chhungah PMGSY Roads, PWD-in a enkawl lai mek te chu chak takin hmalak a ni. Nikum December 2013 thlenga an hnathawh zawhfel tawhte chu - 1). Hnahthial huamchhungah kawngpui 3 (48.40 kms), Lungsen-ah kawng 5 (41.38 kms) leh Lunglei chhungah kawng 2 (50.14 kms) te a ni. Heng bakah Lunglei By-pass Road tur pawh hmalak tum a ni.

6. Soil & Water Conservation Department chuan Integrated Watershed Management Programme (IWMP) atan Cheng nuai 27 an hmu a, chak taka hmalak mek a ni. Kanghmun leh Sekhum-ah ruahtui khawlna tur Rainwater Harvesting Tank sakna project 5 kalpui mek a ni a, tun thlaah zawh beisei a ni. Leilung leh tui luangral tur venhim nana pawimawh em em Thingphun pawh uar taka kalpui mek a ni bawk.