No.2898/2020-2020

July Ni 6,2020 a DM&R Minister hova thukhawmin tunhnaia tum engemawzah lirnghingin a tihbuai Indo-Myanmar ramri dep Champhai district khaw hrang hranga chhiatna thlengte enfiaha, mipuite hnena zirtirna pek nise, ti a a lo rel tawh bawhzuina kalzelah DM&R Department hotu leh mithiamte chuan lirnghing tuar khuate vawiin atang khan an tlawh kual tan. DM&R Team hi Joint Director (Operation) Pu Lalrinawma Traite hovin an thawkchhuak a ni.

Pu Lalrinawma Traite chuan tunhnai lirnghing tum engemawzah thleng vanga chhiatna tuarte an tuarpui takzet thu sawiin, an harsatnate hriain Sawrkar leh district thuneitu te'n theihtawp chhuaha hma an lak mek zel thu a sawi a. DM&R Minister leh lirnghing thlenna bial vawngtu MLA te ngaihpawimawh em avang leh hmalakna avanga DM&R Team te harsatnate enfiaha, zirtirna leh a theih ang ang chhawmdawlna pe tura thawk chhuak an nih thu a sawi. Dungtlang khuaah SDRF Team dah anih thu leh mipui thlabarte hnem turin Clinical Psychologist-te an chet chhuah mek thu a tarlang bawk. Chanchinbu leh Cable TV kaltlanga mithiamte zirtirnate pekchhuah thinte ngaipawimawh fo tura chahin, him dam taka an awm zel theihna turin duhsakna a hlan a ni.

Pu Lalnunfela Chawngthu, SDO Sadar Champhai chuan DM&R team te chu lirnghing vanga harsatna thlengte endika mipuite zirtirna pe tura lokal an nih thu sawiin, mipuite kohkhawm rem chiahlo mahse pawl hrang hrang aiawh kohte chu zirtirna pekte ngun taka ngaithla a, theihtawp chhuaha midangte zirtir chhawngtu nih tum turin a chah a ni.

Khawtlang hruaitute nena inkawmhona hunah hian Er. Lalbiakzuala, Asst Director (Training) leh Pu Zothansanga Hmar, District Organizer ten zirtirna an pe a. Village Level Disaster Committee phuisui leh viak tha tak khawtlangin an chhawmnung zel angaih thute, thiam bikna nei leh hmanraw remchangte thiam taka hman anih theih dan turte sawifiah a ni a. In leh lo sak dan fimkhur angaih thu leh chhiatrupna thlen thulha chiai mai lova chet lak dan turte mithiam te'n zirtirna an nei bawk a ni. Disaster Management Plan hnuaia Shelter Management Team, Food and Water Supply Team, Patrolling and Carcass Disposal Team, Trauma Councelling Team leh hriattur pawimawh dangte zirtirna neih a ni bawk.

Khawtlang hruaitute chuan State sawrkar ruahmannaa kaltlanga DM&R Team te'n lirnghing tuar khaw hrang hrangte a hmun ngeia kalchilha an tlawh chu lawmawm an tih thu leh chhawmdawlna hmanrua an dawn vangin lawmthu an sawi a ni. DM&R kaltlang hian chhiatna tuar khuate tan Emergency Kit, Silpauline, Torchlight, Pamphlet leh disaster hmanraw dangte sem chhuah nghal zel a ni.

DM&R Department atang hian Joint Director (Operation) Pu Lalrinawma Traite bakah Pu H.Lalduata, Asst Director (Operation), Er. Lalbiakzuala, Asst Director (Training), Pu Zothansanga Hmar, District Organizer, Pu Hruaimawia, District Organizer te chuan Indo-Myanmar ramri dep khuate an tlawh mek a, Champhai atangin Pu Lalnunfela Chawngthu, SDO Sadar leh Dr. Lallawmkima, DIPRO te'n an tawiawm a ni.

DM&R Team te hian Khawbung RD Block huamchhung fangkual turin vawiin chawhnu khan Khawbung an pan a. Naktuk atangin Indo-Myanmar ramri dep khaw hrang hrangte an fang chhunzawm leh dawn a ni.

Naktuk atang vek hian Sawrkar leh MZU mithiamte tangkawp chuan Champhai district mipui lirnghing tuar mangang leh thlabarte tan Psychological Clinic an huaihawt tan dawn a. Team 7 ah inthenin Indo-Myanmar ramri dep khaw 31 a mipuite thlamuan tur leh counselling an mamawhna apianga pe turin hma an la dawn a ni.