No.2981/2020-2020
Mizoram sawrkar Disaster Management & Rehabilitation Department leh Mizoram University hmalakna kaltlanga tunhnai Lirnghing vanga rilru lama hlauhthawnna a khatte puibawm a, kawng kawh hmuh tur Psychological Support & Guidance Team 7-te chuan sawrkar ruahmannain East Tuipui bial chhung bakah Champhai South bial Kelkang leh Zokhawthar chhehvel an la fang kual mek zel a. Vawiin khan Psychological Support & Guidance Team leader leh MZU-a Psychology Department Head ni bawk Prof. Zokaitluangi hovin Khawbung Community Hall-ah hun hman a ni.
Prof. Zokaitluangi chuan mihring rilru sukthlekin taksa khawl a tih danglam theih dan te, mihring zel dinnain kan hlauh leh hlauh loh a siam dante, hlauhna chu mihringa awm, mihringte himna atana pawimawh a nih laia hlauhna awmze nei lovin mihring himna a tihderthawn theih dan chi hrang hrang zirtirin, zawh duh neite tan zawhna hun leh chhanna hun an siam bawk a ni.
Tuipuiral huam chhunga mihring hriat tham lirnghing vawi engemawzah avanga rilru lam harsatna neite chu a mal malin an harsatnate zawtin mithiamte hian kaihhruaina an pe bawk a ni.
