No.290/2021-2022

Aizawl, 27th April, 2021: Vawiin khan Pu Lalchamliana, DM&R Minister hoin DM&R department hotuten State Disaster Management Department in Mitigation Project siama a hmachhawp hna hrang hrang National Disaster Management Authority a thehluh tawh te chungchang thlir hoin tunlaia Mizoram hmun hrang hranga kang mei chhuak chungchang an sawi ho bawk a. Department in chak zawka bawhzuia hma lak dan tur an rel a ni.

Meeting ah hian DM&R Department in tun dinhmuna Project a ruahman te ennawn a a pawimawh dan indawt deuha bawhzui tura rel a ni a. Hunthar – Vaivakawn inkar te, Lunglei College Veng te, Phullen leh Khawzawla lei tlahniam te chu kuminah ngawrh zawka buaipui tum a ni.

DM&R Minister chuan Mizorama hmun hrang hrang hmun 30 dawn lai maiah ram kang a chhuak leh Bungtlang South ah te phei chuan chenna in 14 lai mai a kang chhia chu pawi a ti hle a. Mizoram Chief Minister Pu Zoramthanga hmalaknaa Lunglei chheh vel bakah district dangte a ram kang thelh nan helicopter hman theih a ni chu a lawmawm a tih thu te, khaw hrang hrangin mahni ram chhung kang thelh tura an thawh nasat zia Sawrkarin a hriat thu leh a lawm thu a sawi a. Kangmei dang a chhuah belh lohna turin fimkhur taka theihtawp chhuah turin mitinte a ngen a ni.