911/2024-2025

Aizawl, the 22nd June 2024:  Vawiin chawhnu khan Aijal Club-ah Central Ministry hrang hrang aiawh, Inter-Ministerial Team leh Mizoram Sawrkar hnuaia concerned Department hrang hrang hotute chu DM&R Minister Pu K.Sapdanga uapna hnuaiah an thukhawm a. Central te leh State Sawrkar aiawh te hian Mizoram hmun hrang hranga Cyclone Remal  avanga chhiatrupna thleng chungchang an sawiho. 

Report leh Presention neih hma hian Chief Secretary Dr Renu Sharma in inlawmna thu a sawi hmasa a. Mizoram sawrkar aiawhin Home Minister Pu K.Sapdanga, DM&R enkawltu Minister ni bawk chuan Central Team te lawmna thu leh State in Cyclone Remal avanga chhiatna liantham kan tawh dan te, kan kawngpui, kan tuilakna, electric hruipui leh khawl chhia siamthat ngai te bakah kan thlawhhma tuilian in a tih chhiat dan te chiang takin a sawi a. Mizoramin Cyclone Remal a tawrhna chu rinphak bakin a nasa a, central Team ten a hmun ngeiah an rawn endik thei chu lawmawm a tih thu a sawi a ni.

Home Minister chuan Chief Minister Pu Lalduhoma'n Union Home Minister Pu Amit Shah hnenah nimin piah khan Memorandum a theh lut tih a sawi. Tuna chhiatrupna lo thlengah hian nunna hlu tak 34 lai kan chan bakah thil tihchhiat a nei nasa em em a. Heng kan hmunhma leh kan hmanraw chhia te a siamthatna atan cheng tam tak sen a ngai dawn tih sawi a. SDRF leh NDRF rate angin mamawh te chhutchhuah a, ngenna siam a ni a ti. Home Minister chuan Mizoramin Cyclone Remal tihchhiat thawm that nan hian a tlem thei ang bera chhutin Proposal Rs 237.6 Crore man a duang tih a sawi.

Inter-Ministerial Team te hi Pu Abhijit Sinha, Joint Secretary, Ministry of Home Affairs chuan a rawn ho a. Member dang te chu  Pu Jintu Das, Director, Department of Agriculture, Cooperation & Farmer’s Welfare, Directorate of Jute Development, Kolkata; Pu Mahesh Kumar, Dy. Director, Ministry of Finance, Department of Expenditure (FCD), New Delhi, Pu Rajveer Singh, Superintending Engineer, Ministry of Jal Shakti, CWC, Silchar; Pu Adelbert Susngi, Regional Officer, Ministry of Road Transport & Highway, Guwahati leh Pu Moti Ram, Assistant Commissioner (NSAP), Rural Development, New Delhi te an ni.

Meeting hi Chief Secretary Dr Renu Sharma in a kaihruaia. He hunah hian  DM&R, PWD, PHED, P&ED, Agriculture leh Horticulture Department ten Power Point presentation an pek te an thlirho a. Power Point Presentation-ah hian Mizoram hmun hrang hranga chhiatrupna a lo thlen dan te leh siamthat hna thawhna tura mamawh zat te chiang takin an tarlang.

Power Point presentation neih zawhah hian  state official te leh central team te hian sawihona an nei chhunzawm nghal a. Pi K. Lalrinzuali, Secretary, DM&R chuan Lawmthu sawiin Aijal Club a thutkhawm pawimawh hi tihtawp a ni.

Aijal Club a thukhawm neih zawh hian a huhovin Melthum, Hlimen, Kulikawn leh ITI venga chhiatrupna thlenna hmunhma te a hmunah an endik.

Vawiin chawhma khan Central Team hian Lengpui atanga Aizawl an rawn pan pahin Sihhmui Lei dawh mek leh Sairang Dinthara Tlawng lui lianin huan thlai a tihchhiat te an endik a ni.