329/2026-2027

Dated Aizawl, the 29th April, 2026: Vawiin chawhnu khan Secretariat Conference Hall No. 1, MINECO-ah Disaster Management & Rehabilitation Department leh Buannel Geo Solutions & Services te ṭangkawp buatsaih Disaster Incident & Reporting Management System “Khuarel” app tlangzarhna hun hman a ni a. DM&R Department Minister Prof. Lalnilawma chuan “Khuarel” app chu a tlangzarh.

DM&R Minister Prof. Lalnilawma chuan thu sawiin khuarel chhiatna a lo thlena mipui mimir, DM&R leh State & District Disaster Management Authority (SDMA & DDMA) te’n rang taka chanchin an inhrilhhriat zung zung theihna leh chhiatna lam record felfai taka dah ṭhat theihna tur ni nghal bawk “Khuarel” app chu DM&R Department leh Buannel Geo Solutions & Services ṭangkawp te’n an lo duangchhuak chu lawmawm a tih thu a sawi a. Mizoram tan thil chhinchhiah tlak tak a nih thu leh Mizoram chu India hmar chhak state zinga hetiang app changkang tak nei hmasa ber kan nih thu a tarlang bawk. Minister chuan Mizoram mipuite chu he “Khuarel” app hman awlsam leh ṭangkai tak hi download a, hmang ṭangkaitu ni ṭheuh turin a chah.

Vawiin programme khuhhawnna thu sawitu Pu Udit Prakash Rai, Commissioner & Secretary, DM&R pawhin “Khuarel” app chu Mizoram sawrkar hmasawnna pawimawh tak a ni tih a sawi a. Mipui ten khuarel chhiatna thleng report chu DM&R department leh DDMA te an hriattir zung zung theih bakah, DM&R department leh DDMA aṭangin khuarel chhiatna chungchanga mipuite hriattur pawimawhte chu he app kaltlang hian an puang darh zung zung thei tawh dawn a ni tih a tarlang a. Hei hian khuarel chhiatna lama hmalakna a tih chak bakah Mizoram chhunga district leh department hrang hrangte inkarah thawhhona a tichakin, a ti awlsam hle dawn a ni tih a sawi bawk.

Buannel Geo Solutions & Services te chuan “Khuarel” app chu a kalhmang leh a app hman dan sawi fiahna neiin ‘Demo Presentation’ an nei bawk a. He presentation-ah hian “Khuarel”app hman dan tur chu kimchang zawkin tarlanna hun an nei a ni.  

Pu Chuauhnuna, Director DM&R chuan lawmthu sawiin vawiin “Khuarel” app tlangzarhna hun chu a khar a ni.