314/2025-2026

Lunglei, 2025 Ṭau thla ni 24: Mizoram sawrkara Disaster Management & Rehabilitation (DM&R) Department Minister Prof. Lalnilawma chuan Ministry of Development of North Eastern Region (DoNER) aṭanga sum hmuh cheng nuai 115 hmanga sak, tui lian leh chhiatna dang avanga chhiat tawkte tluk luhna leh tawm himna tur, DM&R Safe House thar Tlabunga mi chu vawiin khan a hawng.

DM&R Minister Prof. Lalnilawma chuan Tlabunga Safe House ṭha tak mai sak zawh leh hawn theih a ni ta chu lawmawm a tih thu sawiin, Safe House sakna atana bul ṭantu sawrkar hmasa leh ruahmanna siamtu department hotute leh ram petu khawtlang hruaitute chungah lawm thu a sawi a. Safe House chu sum tam tak senga sak a ni chungin hman ngai lo se tih chu a duhthusam leh ṭawngṭaina a nih thu sawiin, hman a ṭul a nih erawh chuan tu mah inthlahrung lovin ṭangkai taka hmang turin a chah a. A enkawl zui dan tur leh hman dan tur chu department lam aṭanga felfai taka ruahman a nih tur thu leh khawtlang mipuite nen ṭang ruala ṭha taka enkawl zui a nih a beisei thu a sawi.

DM&R Minister chuan Mizoramin khuarel chhiatna hrang hrang kan tawk nasa a, boruak leh sik leh sa inthlakthleng avangin chhiatna a la thleng zel dawn tih sawiin, chuti ang karah chuan DM&R Department chu mi dangte tana thlamuanna thlentu leh ṭanpuitu a ni tih a sawi a. DM&R hnuaiah chuan chhiatna thlen hnua chhawmdawlna mai bakah, a thlen hmaa lo inven lawkna leh chhiatna thleng tur tinep tura ruahmanna kalpui ṭhin a nih thu sawiin, mipuite chu sawrkar thuneitute leh department hnenah harsatna leh chhiatna thleng thei hrilh hre zung zung a, theih tawpa sawrkar thawhpui turin a chah a. Chhiatna thlen thulhah department, khawtlang hruaitu, tlawmngai pawl leh mipuite chu ṭan rual thiam a ngaih thu sawiin, training ṭha tak nen fimkhur taka hma lak a ṭul avangin department pawhin khaw tinah chhiatna lama hma la tur bik mi thiam chher chhuak tura ruahmanna an siam thu a sawi a. Tlabung chu Mizorama khaw hlun leh pawimawh a nih angin sawrkar chuan a theih ang anga thuam leh tihhmasawn zel a tum dawn tih sawiin, hmasawnna hna pawh a tahtawla thawh chhoh zel a nih tur thu a sawi.

West Tuipui bialtu MLA Pi Prova Chakma chuan Tlabung leh a chhehvelin kum tin tui lian an tuar ṭhin thu sawiin, tui lian avanga chenna in chhia leh leilet leh huan chhia thleng ṭhin chu an harsatna kumhlun a nih thu a sawi a. Mipuite leh kut hna thawktute chhawmdawl leh tuamhlawm kawngah theih tawpa hma lakpui zel tur te, Safe House chu Tlabung chhehvel hmun dangah pawh sak belh leh tihchangtlun a nih theih nana hma lakpui tur te, kangmei avanga chhiat tawkte chhawmdawlna leh chhiatna laka invenna atana hmanraw mamawhte ngaihtuahsak tur te'n Minister chu a ngen a ni.

Safe House, Tlabung hawnna inkhawm hi DM&R Director Pu R. Vanrengpuia'n kaihruaiin, Presbyterian Church of India (PCI) Tlabung Chawnpui bialtu pastor Rev. C. Lalngaihawma'n hunserh a hmang a. Public Works Department (PWD) Lunglei Building Project Division aṭangin technical report ngaihthlak niin, DM&R Deputy Director Pu Lalbiakfela'n Safe House sa tura hma lak chhoh a nih dan a sawi a. Lunglei District Disaster Management Authority (DDMA) ai awhin Tlabung Sub-Divisional Officer (Civil) Pu Moses Lalfakawma Tlau chuan thu sawiin, DM&R Joint Director (Operations) Pu Francis Lallawmkima'n lawm thu sawiin hun a khar a ni.

He hunah hian Minister leh MLA te bakah, Lunglei Municipal Council (LMC)-a councillor Pu R. Lalramzauva leh Pu Vanlalliana Pachuau te, Rural Development & Administration Department Additional Secretary Pu V. Lalengmawia leh DM&R leh department hrang hrang official-te, khawtlang hruaitute, tlawmngai pawl hruaitute leh political party hruaitute an tel a ni.

Kum 2017 May leh July inkar chhunga ruah nasa taka sur avanga Mizoram puma chhiatna hrang hrang thlengah Mizoram sawrkar DM&R Department chuan sawrkar laipuiah puihna dilin, Memorandum for Seeking Central Assistance siam a ni a. Chhiatna hrang hrang thleng chhawmdawlna atan DoNER hnuai aṭangin "One time Central Assistance for Rebuilding totally damaged/washed away infrastructure during floods in 2017" atan cheng nuai 1,483 hmuh niin, he project hnuaiah hian component pathum - Road & Bridges (PWD - ₹ 815 lakh), Agriculture & Allied Sector (I&WR - ₹ 333 lakh) leh Social Infrastructure (PWD - ₹ 335 lakh) te a awm a. Safe House hi Social Infrastructure component hnuaiah awmin, Tlabung bakah hian Sairangah sak a ni bawk a, Sairanga Safe House hi November ni 28, 2024 khan hawn a lo ni tawh bawk.

Tlabunga Safe House hi tui lian avanga harsatna leh chhiatna dang a lo thlen thlulha mihring emaw, bungrua emaw indah lailawkna leh tawm himna atana ruahman a ni a. A sak hna hi contractor, Pu F. Lalsangliana, Aizawl chuan thawkin, ni 30.11.2021-ah hna ṭan a ni a. RCC footing & structure chhawng hniha sak niin, a chhawng chung leh hnuaiah hian pindan zau pakhat ve ve, bathroom pahnih ve ve, toilet pahnih ve ve leh bathlar pakhat ve ve a awm a. Ni 24.2.2023 khan sak zawh niin, PWD hnen aṭangin ni 9.1.2025 khan DM&R Department chuan a la chhawng a ni.

Safe House hawn rual hian DM&R Department chuan chhiatna laka inralrinna leh inven himna atan Tlabung khaw chhunga VDMC leh YMA te hnenah heti ang hian hmanraw mamawh an sem nghal a ni:

A. Tlabung Village Disaster Management Committee:
1. Silpaulin Small size - 1 no.
2. Silpaulin Big size - 1 no.
3. Silpaulin Small size - 1 no. for Tlabung Dinthar
4. Hruizen 20mm, 50mtrs - 1 no. for Tlabung Dinthar

B. Zodin Village Disaster Management Committee:
1. Silpaulin Small size - 1 no.
2. Silpaulin Big size - 1 no.

C. Tlabung Branch YMA, Zodin Branch YMA leh Chawnpui Branch YMA te hman tur:
1. Hruizen 20mm, 50mtrs - 2 nos. ṭheuh (i.e. 6 nos.)
2. First Aid Kit - 1 no. ṭheuh (i.e. 3 nos.)

D. Khawthlangtuipui Group YMA hman tur:
1. Hruizen 20mm, 50mtrs - 3 nos.
2. Hruizen 20mm, 100mtrs - 1 no.
3. Life Jacket - 10 nos.
4. First Aid Kit - 3 nos.
5. Head Torch - 10 nos.
6. Torch Light - 3 nos.

Vawiin vek khan RD&A, PHED leh DM&R Minister Prof. Lalnilawma hian MGNREGS Material Component aṭanga cheng nuai 14 senga Tlabung Zodina Laldanga Field panna kawng (approach road) metre 320-a thui laih hna leh cement concrete pavement siam hna zawh fel tak chu a hawng nghal a. Tlabung Sub-Divisional Hospital building thar tur leh BADP aṭanga Tlabung SDH casualty & emergency room leh birth waiting room sak mek te, Tlabung PHED pump house leh Indo-Bangladesh border trade hmun tura ruahman Kawrpuichhuah te a tlawh nghal bawk.