No.2979/2020-2020 

Tunlai hian Disaster Management & Rehabilitation Department hmalaknain  Khawbung RD Block huam chhung khaw hrang hrangah chhiatrup thlen thulha inzirtirna leh lo invenlawkna dan in hrilhhriatna kalpui zel a ni.  DM&R Team hi Joint Director (Operation) Pu Lalrinawma Traite hovin an thawk chhuak a ni.

DM&R mithiamte hian tukin khan Khawbung Zawlbukah Mistiri – concrete in sa thin, lungrem leh thing in sa thinte ko khawmin lirnghing laka in sak dan him leh lirnghing tihhmelhem thawm that dan tur in zirtir a ni.

DM&R  Joint Director Operation Pu Lalrinawma Traite chuan kalkhawmte chu mithiamte thusawi ngai pawimawha zawm hram hram turin a chah a. Hruizen, Tuipuanpui (tuffpaulin), Kawlphe-khawnvar, hliam sawngbawlna damdawi leh thu chhiar tur lehkhabutê a hlân nghal a ni.

Er. Lalbiakzuala, Assistant Director, Training, DM&R chuan tun tum lirnghingin in leh lo a sawi chhiatte chu ban atanga beam thlawh chhuahtir leh in hnuai lam beam leh ban remphui loh a ni tlangpui tih sawiin, heitang anga in sak hi lirnghing laka a him lo hmasaah a tang zel tih a sawi a. Zone 5 huamchhunga awmte tan Banga leirawhchan (brick) rem chu a bawk zawnga rem hram a him thu a sawi bawk.

Khawbunga tukthuan an eikhamah DM&R hotute hian mipui tlawh thin pipu sulhnu hmun hlui Lianchhiari lunglen tlang leh Thasiama Seno neihna tlang him leh him loh an tlawh a, Samthang leh Vaphai tlawhin zaninah Farkawnah an riak lut dawn a ni.

DM&R Team-te hi Khawbung BDO  Pu Benjamin Zalawma Ralte, Dungtlang Police OC Pu C Lalsangliana leh a ho te’n  an tawiawm a ni.