Vawiin khan Doctors' Conference Hall, Civil Hospital Lungleiah Stake Holder & Journalist meeting on' Reduction OF Infant Mortality Rate (IMR) in Lunglei District' neih a ni a. Principal Director, Health &Family Welfare Department Dr.K.Ropari hova meeting neih hi Dr. VLMS Dawngliana, CMO Lunglei chuan a kaihruai a, naupang kumkhat hnuai lam thihna (Infant Mortality Rate) tih hniam chungchang thil pawimawh hrang hrang sawiho a ni.

Dr. K. Ropari chuan thusawiin ram changkang leh changkang lo tehna pawimawh tak pakhat chu naupang kumkhat hnuai lam thi leh Nu nau chunga thi an tam leh tlem thu a ni a, India rama District hrang hrang 184, naupang kumkhat hnuai lam thi tamna District zingah Lunglei District pawh telin, Mizoram District 8 zinga 4-ah Mizoram chhim lam District 2 dang - Saiha leh Lawngtlai te pawh a tel a ni, a ti. Nausen kumkhat hnuai lam thi tih tlemna tur leh nu nauchunga thi (Raicheh) tih tlemna turin NRHM leh NHM hnuaiah kawng hrang hranga hmalak a nih thu a sawi a, hetianga kumkhat hnuai lam leh raicheha thi hi thingtlang lamah chuah ni lo khawpui daifem, Damdawi In lian zawk pan harsatna hmunah pawh a thlen thin avangin, Lunglei District tan pawh Urban Health Centre thar Sazaikawn hmunah dah tum mek a ni tih a sawi bawk. Ram pe theitu awmse chuan mi in luah emaw a ngaih loh tur thu a sawi a, heta thawk tur hi Nurse chu hmuh tawh a nih laiin, Doctor thawk tur erawh an la hmuh zawh loh thu a sawi a, Doctor he hmuna thawk duh tur an awm a nih chuan kawhhmuh turin an inhawn reng thu a sawi.

Lallianzuala, NHM Consultant pawhin Projector hmangin, Lunglei District-a naupang kumkhat hnuai lam thi leh Nu nau chunga thi (raicheh) chungchang entira sawizauin, hetiang hi hmeichhia kum 21 - 30 inkarah leh Matric pawh pass lo hmeichhe zingah a thleng tam bik a ni, a ti.

Dr. Lallianpuii, Unicef Co-ordinator, Mizoram pawhin thu sawiin hmeichhia an raipuar laia inenkawl that a pawimawhzia thu te, naupiang hlim normal chu Kg 2 leh gram 500 a nih thu te, naupang kum khat hnuai lam thih chhan tam ber chu Pneumonia vang a nih thu leh naupang kumkhat hnuai lam thi leh Nu nau chunga thi tih tlemna turin Medical lama thawktute bakah veng leh khawtina ASHA te an pawimawhin, thawhhona tha tak an neih a tul thu a sawi.

He meeting-ah hian Doctor dangte leh NGOs YMA Sub Hqrs. Lunglei, MHIP Sub Hqrs. lam aiawhte leh MJA lam atangin thusawi bakah zawhna leh chhanna hun te hman a ni bawk.