2449/2025-2026

Dated Aizawl, the 28th November, 2025: Vawiin khan State Hub for Empowerment of Women (SHEW), Directorate of Women & Child Development chuan Domestic Violence Week 2025 denchhenin Mizoram Assembly House Annex Conference Hall-ah hmeichhiate chunga hleilenna thleng thin chungchang inzirtirna hun buatsaihin, ‘Empowering Women - Last Mile Delivery of Service’ tih thupui hmang, 16-Day Campaign on Ending Gender-Based Violence (25th November – 10th December) a hawng nghal a. Pi Zonunthari, Joint Secretary, Social Welfare, Women & Child Development Department chu khuallian a ni.

Khuallian Pi Zonunthari chuan thu sawiin, hmeichhiate chunga hleilenna chu hmeichhiate dikna chanvo palzutna mai ni lovin mihring dikna chanvo rahbehna a ni, a ti a. Khawvel puma hmeichhiate chunga hleilenna thlen nasatzia tarlangin, mipuite hnena hetiang lam zirtirna tha pek mai bakah hmeichhiate chu tihchak a, an dikna chanvo hriatchiantir a pawimawh a, an dikna chanvo hum thei tura eizawnna mumal an neih leh justice system an banphak a ngaih thu a sawi a. Tin, hmeichhiate chunga hleilenna tibo tur chuan fapate enkawl uluk a ngaih thu sawi bawk a ni.

Inzirtirna hun hi Pi Sailopari, Joint Director, WCD, SWW & CDD chuan kaihruaiin, inlawmna thu a sawi nghal a. Pi Lalnunmawii Varte, Core Faculty, ATI chuan 'Gender Based Violence awmzia leh a nghawng theihte' tih thupui hmangin a zirtir a. Skill development, prevention of gender-based violence, legal access, leh service linkages chungchang sawihona neih niin,  Pi Flora Laltanpuii, Deputy Director (Women) WCD chuan a kaihruai a. Pi Sailopari, Joint Director, WCD, Pi Lalhriatpuii, Sr. Civil Judge & Secretary, DLSA, Aizawl, Pi Priscilla Lallawmsangi, Legal Officer, Mizoram State Commission for Protection of Child Rights, Pi Jordanthangi, LESO (Skill), LESDE Department, Pu C. Lalnghakliana, Research Officer, Planning & Programme Implementation Department (Bana Kaih) leh Pi Lalrinhlui Sailo, OSD & Nodal Officer (Training Centres), Directorate of Social Welfare, SW, W&CD Department-te’n sawi hawngin, mipui lam atanga zawhnate an chhang a ni.

He inzirtirna hunah hian Mizo Hmeichhe Insuihkhawm Pawl (MHIP), Single Moms' Foundation, Street Vendors (UD&PA), domestic workers leh sawrkar department hrang hrang aiawhte bakah sawm bik – Association of Theologically Trained Women of India (ATTWI), Young Women's Christian Association (YWCA), Lai Women Association (LWA) leh a dangte an tel a ni.