No.2077/2021-2022
Aizawl 1.9.2021: India hmarchhak state-a agriculture tihhmasawn kawnga hmalak chungchangah nimin (31.8.2021) khan DoNER Minister Pu G. Kishan Reddy hovin India hmarchhak state Chief Minister-te leh an aiawhte chuan virtual meeting an nei. Union Minister for Agriculture and Farmers Welfare Pu Narendra Singh Tomar chuan a telpui. Mizoram Chief Minister Pu Zoramthanga leh Agriculture Minister Pu C. Lalrinsanga pawh an tel a ni.

He meeting-ah hian sawrkar laipuia Dept. of Agriculture and Farmer's Welfare atanga 10% GBS tangkai thei bera hman chungchang te, bamboo leh oil palm development chungchang te, horticulture leh organic farming tihhmasawn leh hmasawnna ruangam pawimawh tak takte sawiho a ni.

Union Minister Pu G. Kishan Reddy chuan rualkhai zawka state te'n DoNER kaltlanga tanpuina an hmuh theih nan hmalak a tul thu leh tanrual a pawimawh thu a sawi a. Tun hnaia National Mission on Edible Oils – Oil Palm kalpui tura sawrkar laipuiin ruahmanna a siam chu a hlawhtlin theih nan India hmarchhak state-te an pawimawh thu sawiin, Mizoram chu Oil Palm chin kawngah sulhnu tha tak lo nei tawh, state dangte tan pawh entawntlak a nih thu a sawi bawk.

Chief Minister Pu Zoramthanga chuan hmarchhak state-te tan NEC leh DoNER a sum dah chu beitham a tih thu leh, hemi atanga state tin ten an dawn chu an mamawh hmasawnna thlen tur atan duhkhawp a tlin loh thu sawiin, ennawn tul a tih thu a thlen a. 10% GBS atanga tlangram state a hmasawnna ruhrel siam tul a tih hrang hrang a sawi bawk.

He meeting-ah hian Addl. Chief Secretary Pu J.C Ramthanga, Pu J.Hmingthanmawia, Special Secretary, Agriculture, Pu Lalmalsawma Pachuau, Special Secretary, Planning & Program Implementation leh Horticulture leh Agriculture department-a hotu thenkhat an tel bawk a ni.

Attachment

  • Loading attachment...