Vawiin khan Chief Secretary Conference Room-ah DoNER Ministry hnuaia NLCPR project chak zawka kalpui dan tur leh project tam zawk hmanga sum tam zawk hai luh dan ngaihtuah turin department hrang hrang atanga senior officer te Pu P.L. Thanga, Member & Secretary, State Planning Board leh Ex-Officio Principal Secretary, Planning kaihhruaina in an thukhawm.
NLCPR hnuaiah hian project kal mek 48 a awm a. Cheng nuai 45,954.83 man sanction awm tawh sa atangin DoNER hian cheng nuai 24,936.51 Mizoram ah a released tawh atangin cheng nuai 15,170.72 hman tawh a ni a. Cheng nuai 9,675.79 hman bang a la awm.
Heng bakah hian project thar 35 cheng nuai 35379.00 man DPR thehluh tawh sa a awm a. Sanction tur DoNER Ministry in a rem tih sa DPR 10 cheng nuai 10962.00 man la thehluh loh a awm bawk.
He meeting-ah hian project kal laia harsatna awm mek ngaihtuah pahin chak zawka kalpui dan tur te, project kal muang deuh te chak zawka kalpui dan tur bakah project zawh hun tur bithliah fel tak siamin a enkawltuten hun tiam chhunga zo hman ngei tura tanla turin an rel bawk.
Project thar DPR fel lo siam that ngaite siam that dan tur leh DPR thehluh loh te thehluhna hun bithliah siamin Department hrang hranga mawhphurhna neitute hriattir an ni bawk.
He thutkhawmnaah hian DoNER Ministry atanga project sanction hmuh hnua rei tak tak hna tan lova harsatna siam a ti khawtlai theite tih bona atan leh awlsam zawka budget allocation, sanction leh tul dang dangte lak kianna turin ‘single window clearance’ hman tan nise : Planning, Finance leh project kalpuitu tur department a mawhphurtute thukhawm a ‘project clearance system’ thar siama kalpui nghal nise an ti bawk.
