Doordarshan Aizawl chuan kumin Assembly Inthlanpui pualin Programme chi hrang a buatsaih chho mek a, zantin dar 7:30-8:00Pm ah ‘Inthlanpui thukhawchang’ tihchhuah thin a ni a, hetah hian Political Party ten Campaign beihpui an thlak mek dan leh Inthlan kaihhnawih chanchinthar ber berte Live-a tihchhuah thin a ni a. He programme ah hian constituency hrang hranga Candidate te chanchin leh an dinhmun tur thlirlawkna te pawh huamzau taka tihchhuah thin a ni bawk.

Assembly inthlanpui neih tur hi chipchiar tak leh huamzau taka cover turin Delhi Doordarshan Team pawhin Mizoram an chamchilh mek a, Inthlan chungchanga mipui aw ‘Janvani’ chu 19/11/2013 zan dar 10:00-11:00Pm ah DD News Channel ah tihchhuah a ni dawn a, hei hi a tuk tlai dar 4 ah tihchhuah nawn leh a ni bawk ang.

Hei bakah hian thalaite programme Gen-X pawh Doordarshan Team hian siamin hei hi inthlan zawh lama tihchhuah tur a ni thung a. Delhi Doordarshan News Team leh Aizawl Doordarshan News Team chuan Mizoram Inthlanpui kaihhnawiha thu thar ber ber tichhuak reng turin Aizawl leh Lungleiah Satellite-a uplink na khawl DSNG an bunfel a, Inthlanpui kaihhnawih Live Discussion leh Live Reporting te a tam thei ang ber tihchhuah an tum a ni.