1842/2025-2026
Kolasib, 10th October, 2025 : Vawiin khan Mizoram Down Syndrome Association (MDSA) buatsaihin Parish Hall, Kolasibah Down Syndrome Awareness pualin hun hman a ni a. He hun hi Pi B Malsawmtluangi, Addl. Deputy Commissioner, Kolasib District chuan khuallian niin a hmanpui.

He hunah hian Khuallian, Pi B. Malsawmtluangi chuan thu sawiin, Down Syndrome nei te'n an mamawh ber chu hriatthiamna leh hmangaihna a ni, a ti a. Down Syndrome chu natna a ni lova, anmahni dinhmun hriatthiampui a, duat taka enkawl an ngai a ni, a ti. Pi B Malsawmtluangi chuan hetiang mi bik te enkawlna kawngah hian nu leh pa te an pawimawh takzet a ni tiin, Pathian tanpuina nena enkawl an nih chuan khawtlang tan malsawmna an ni thei a ni, a ti bawk. Down Syndrome chu tunhma atanga awm tawh ni mah se, tunah chuan mipui zinga hriatna a zau belh zel chu lawmawm a tih thu sawiin, "Kan inpuih tawn a, inhriatthiam tawna kan in-support tawn hi an tan leh an chhungkuate tan a pawimawh takzet a ni," a ti.

Vawiin huna Thupui "Improve our support system" tih hmanga hun hman hi Pu ZR Thafala, Finance Secretary, MDSA chuan a kaihruai a. Capt. Joseph Rozamliana'n hunserh a hmang a, Pu Lalremruata, Secretary, MDSA pawhin thusawi tawi a nei bawk.

He hunah hian zawhna leh chhanna leh inzirtirna hun tha tak hman a ni a, MDSA Goodwill Ambassador , Pu Henry Varte leh zaithiam dangten zaiin mipui an awi bawk a ni.

Pi Lalhlimpuii Ngente, Member, MDSA in lawmthu sawina hun a hman zawhin he hun hi khar a ni.