Nimin tlai dar 5:00 PM khan Aijal Club Conference Hall-ah Dr. Inder Jit Singh, Secretary, Ministry of Development of North Eastern Region (DONER) hovin DONER Ministry leh NEC sum kaltlanga hmasawnna hna – project leh scheme hrang hrang thawh mek te thlir letna ‘Review Meeting’ neih a ni a. Meeting ah hian Chief Secretary Pu Lalnunmawia Chuaungo leh Line Department Secretary leh Head of Department te bakah NEC leh Ministry of DoNER hotu dangte an tel bawk a ni.

Dr. Inder Jit Singh chuan Mizoram lokal a meeting a neih chhan chu project te endik emaw, thil tih dan sawisel emaw tura lo kal anih lo thu sawiin Mizoram in chak leh zawkin engtin nge hma a sawn theih ang tih te, hmasawnna tehfung hrang hrangah engtin nge dinhmun sang zawkah Mizoram leh Mizo mipuite an in hlankai theih ang tih te leh a hmun a lo kala thil awm dan te sawiho a duh vanga lo zin a nih thu te a sawi. Hmasawnna atan sum chu a tlem lova, Ministry tinin Hmarchhak hmasawnna atana an Budget atanga za zela 10 an dah hran chu Ministry tam takin an hmang bang nasa tih tarlangin, chawhrualin he sum tlingkhawm atang hian za zela 50 awr chauh hman anih thu a sawi.

Dr.Inder Jit Singh chuan he sum hi hlawk takin Hmarchhak state ten an hman theih nan State Sawrkar tih tur leh kal dan tur te a tarlang a. Sum hman ban a tam thuah State Sawrkar te chauh an ni bik lova Ministry lam te hi kan inenfiah a ngai ve tho a ni tiin, chutih rualin NEC project bikah NEC in a vilzuina 'monitoring' lamah tan an lak a ngaih thu a sawi. Tun hnaia Ministry tinin 10 percent an hman dan dinhmun dil a, Hmarchhak state tin Chief Secretary hnenah a thawn thu sawiin, hei hi sawrkar kum tharah proposal thar tam zawk a hrinchhuah a beisei tih a sawi.

Chief Secretary Pu Lalnunmawia Chuaungo in thuhma a sawinaah Mizoram Sawkar chuan hmasawnna leh ruahmanna te kalpui kawngah theihtawp a chhuah tih sawiin he inkawmhona hian Mizoram hmasawnna atan rah tha leh thil thar a hrinchhuah ngei a beisei tih a sawi bawk a ni.

Planning Department chak tak Mizoramin a nei nia a hriat thu Pu Saurabh Endley, Joint Secretary, MDONER chuan sawiin normative allocation a sum hmanah Assam hman zat thuak Mizoramin normative allocation atanga a hman thu a tarlang.

Secretary, MDONER chuan tunhnaia proposal thar pawm tak, cheng vaibelchhe 1993 hu Aizawl a Cable Car Transport Project pawh sawilangin NITI Aaayog in a pawm dan leh hemi atana funding Ministry ni turin Ministry of Road Transport & Highways chu tihfel anih tawh thu a sawi a. Thingpui chin, mau leh rua chungchang, sangha khawi, ranvulh leh tourism te chu Mizoramin potential a neih thatna nia tarlangin heng sector ah te hian proposal liam tham siam turin Mizoram Sawrkar hotute a chah a ni.

Meeting ah hian Planning & Programme Implemantation Secretary Dr. C. Vanlalramsanga in Non Lapsable Central Pool of Resource (NLCPR), North Eastern Council(NEC), North East Special Infrastructure Development Scheme(NESIDS), National Rural Livelihoods Mission(NRLM), North Eastern Region Community Resource Management Project (NERCOMP)/North East Rural Livelihood Project(NERLP) sum leh ruahmanna kaltlanga Line Department ten hmasawnna hna hrang hrang an thawh mek te dinhmun leh henga harsatna hrang hrang an tawh te Power Point presentation hmangin a tarlang a. Presentation ah harsatna tarlan te sawiho niin a sutkian nan Pu Inder Jit Singh chuan rawtna hrang hrang a siam nghal a ni.

Aspirational District – Mamit, North Eastern Regional Agricultural Marketing Corporation Limited (NERAMAC) leh North Eastern Handicrafts & Handlooms Development Corporation (NEHHDC) hmalaknate te pawh tarlan niin NERAMAC leh NEHDDC te hma lakna thar tur pawh meeting ah hian sawi a ni.