No.266/2020-2021

Tukin dar 7:00Am khan a bial fanga cham mek Dr. K. Beichhua, Hon’ble Minister leh Siaha Bialtu chuan Civil Hospital, Siaha tlawh in, COVID-19 laka invenna leh ruahmanna hrang hrangte a hmunah a enfiah.

Minister hian Hospital a COVID-19 thleng palh thei laka inven dan, inenkawl zuina leh ruahmanna hrang hrangte chu uluk takin a enfiah a, CMO leh Medical Superintendent ten an hmalakna leh ruahmanna te lo hrilfiahin hmalak la ngaite an lo thlen nghal a ni. Duhthusam angin ruahmanna la awm thei lo mahse tun dinhmunah Siaha Civil Hospital inbuatsaihna leh ruahmanna hi tha tawk hle a ngaih a ni. Hospital-ah hian COVID-19 Casualty, 20 Bedded- Isolation Ward, 5 Bedded -ICU leh Preparation & Changing Room te siam fel vek tawh a ni.

Civil Hospital a tlawh zawh hian Minister chuan Siaha khawchhunga veng hrang hranga COVID-19 Local Task Forces Duty Post zawng zawng Minister hian a tlawhchhuak nghal vek bawk a ni.

Minister chuan Task Force Duty te chu an thawhrimna leh inpekna ropui tak avangin lawmthu a hrilh hlawm a, tun ang zela inthladah miah lova he rawngbawl hna hi thawk chhunzawm zel turin a chah hlawm a ni.

Task Force Duty Post hrang hrangah thusawina nei zelin Minister chuan, “He hri hlauhawm tak hi lo thleng thut a nih avangin inven lawk a ruahmanna lo siam lawk thei a ni lova. Chuvangin sawrkar, NGO’s leh VC ten tlachawpa rilru fim tak leh thukhat vuana rem kan ruat hi kan hmalak theihna awmchhun a ni ber mai a, nang leh kei intih lovin leh Political Party inthliarna awm miah lova thawktlang tur kan ni.He hri hian khawvel ram hausa leh Health Care nei tha ber berte ram pawh a dim lova, vei tam leh thihpui tam ber an ni zawk zel tih kan hria. Kan ram hi min rawn luhchilh tak tak chuan kan dinhmun tur hi suangtuah ngam pawh a ni lo. Chuvangin kan himna awmchhun chu thuawi taka inven a, Task Force te inthladah miah lova mahni veng theuh venhim hnathawk hi a ni.” a ti.

Minister chuan sawi chhunzawmin, “He hri lakah hian tih tur pawimawh em em pahnih kan nei a. Pakhatna-ah chuan fimkhur taka theihtawp chhuaha inven a ni a, pahnihna- ah chuan khawvel Economy tlusawp vek tur hmachhawn mai thei leh tam mai thei dinhmunah kan ding thuai dawn a, hemi laka kan him theihnan lo leh huan lamah kuthnathawh i uar ang u. State dang atanga Supply kan hmu a tawp hunah chhuanchham a kan awm loh nan veng tin leh khaw tinte hetiang lamah ruahmanna siam thuai ang u. Kan hun tawng mek hian eng chen nge a awh dawn kan hre lo, chuvangin Task Force leh Sawrkar chuan Management thiam takin kan kalpui a tul, Kan essential Commodities neih ang ang te pawh renchem taka kan hman thiam a ngai hle ang. Mi harsa zualte dinhmun en thlithlai reng u la, inthlahrung lovin kei, CEM leh DC te pawh min hrilh zel mai dawn ni a. Lo thlaphang lutuk lo u la, CM Relief fund te pawh a lo la thleng dawn, Disaster Management fund te pawh kan dil belh zel ang, a tul chuan kan MLA fund te pawh kan hmang vek mai ang.Amaherawh chu engtianga rei nge kan inkharkhip dawn tih a la hriat si loh avangin, Sawrkar chuan ei leh barah inrenchem taka kan neih sa te kan hmanthiam a duh hle a, tanpuina pek kawngah pawh vawikhata KI sang taka rik nghal bawrh bawrh ai chuan inremchem takin, kan hmalam huna mamawhna sang tak awm theih thlir renga chet hi a duhdan a ni.” a ti bawk.

Minister hian a bial a fan lawk theih lohna chhan sawiin, Aizawl leh State danga kan District mi zirlai te, damlohna avanga mangang taka awm mek te leh hnathawk mi tam tak tangkhang leh harsatna tawk mek te buaipui reng an tul thu a sawi a. Aizawl atanga Siaha inkarah Bus 13 lai an tlantir tawh thu leh hmun hrang hrang mite pawh thei ang anga a buapui ve zel thu sawiin, Mizoram pum huap ang pawha hmalakna tur a kovah tam tak a innghah ve avanga a bial a tlawh lawk thei lo thu a sawi a, bial mipuite hriatthiamna a ngen nghal bawk a ni.

Minister hi Pu N. Zakhai, CEM MADC; Pu Bhupesh Chaudhary, DC Siaha; Pu HC. Lalmalsawma Zasai, Opposition Leader, MADC; Dr. C.Hniecho, CMO Siaha; Dr. C. Lalrosanga, Medical Superintendent, Civil Hospital, Pu.N.Vabeiratlua, I&PRO, Pu Lalthakima, SDC leh Pu Lalrosanga , Chairman, Joint VC te’n an tawiawm a, Task Force Duty Post tin te chu tanpuina sum a hlan theuh bawk.