Vawiinah Dr. K. Beichhua, Hon'ble Minister chuan Siaha khaw pawn lama a bial khua te a tlawh.

Minister hian Chhaolô tlangdung fangin Noaotla-I,II&III, Lobo-I&II, Chhaolo-I,II&III a VLTF te kawmin an hmalak tawhna leh dinhmun te a hmunah a enfiah. Veng tina VLFA te hian an hmalak dan te report pein,  an harsatna leh mamawh thil  te Minister hnenah hian an lo thlen  bawk a ni. Minister chuan kan Chief Minister zahawm tak kaihhruaina hnuaiah a tul ang zel a mipui tan chak taka ke an pen zel tur thu sawiin, mipuite chu hlauthawng lutuk lo turin a chah.

Minister chuan MLA leh Minister tam zawk ten an bial an tlawh vek tawh hnua a bial a rawn tlawh lawk theih lohna chhan sawiin, "Kan fate Covid-19 lenna ram atanga lo haw te an awm avangin sawrkar thupek zawmin ni 14 chhung inah Quarantined in kan inkhunghrang a. Phone hmangin in atangin hna ka thawk a ni," a ti a. Tin, State pawna damloh, zirlai leh hnathawk tam tak Siaha District mi mangang taka tangkhang mek te an awm thu leh, chung ho buaipui hna chu Aizawlah a theih ang tawka a thawk ve zel thu a sawi a, "Aizawl leh Siaha inkarah MSO te nen tanghovin Bus 12 lai kan tlantir tawh a ni," tiin bial a tlawh lawk theih loh avangin mipui hriatthiamna a ngen nghal a ni.

Minister chuan sawiin, "He natna hlauhawm tak hian khawvel ram hausa leh thiltithei te a dim hauh lova, a tuar ber ber te an ni tih kan hria. Kan ram phei chu min rawn luhchilh tak tak ta se kan tawrh dan tur hi suangtuah ngam chi pawh a ni lo. Chuvangin kan ti thei sang ber chu theihtawpa lo inven a, sawrkar leh VLTF te thupek leh hmalakna te thuawih taka zawm hi a ni.

"Chief Minister zahawm tak kaihhruai Mizoram sawrkar leh Chief Secretary kaihhruai State Task Force ten theihtawp chhuahin kan tan an rilru zawng zawng sengin hma an la reng a, CM Relief Fund leh Fund hrang hrang atang te pawhin kan mamawh te min rawn ngaituahsak zel a, a lawmawm tak zet a ni. Heng Fund te leh MLA Fund atanga tanpuina kan inpek ang ang te hi renchem leh hlawk theih ang bera hmang turin ka ngen a che u," a ti.

Sawi chhunzawmin Minister chuan, "State pawn lam atanga Supply a innghat mai kan ni a, heng Supply te hi lo tawp thut ta se tam nasa tak hmachhawn theih dinhmunah kan ding reng a ni. Chuvangin tun atangin mipuite thahnemngai takin lo leh huan hnathawk lamah tan i la ang u. Khawvel leh Indian Economy tlusawp nuai tawh nghawng hi a na hle dawn a, ei leh bara kan intodelh theihnan thlai chi hrang hrang te i ching theuh ang u.

"Tun hun khirh takah hian nangni leh keini tih a thiang lova, Political Party inthliahhranna hun a ni hek lo. Kan damkhawchhuah nan kan zavaiin inhmangaihtawnna nen i thawkho tlat ang u. Kan mipuite riltam a in awm hi sawrkar chuan a ngaingam lova, kan damkhawchhuahna hi Politics pawimawh ber a ni. Chuvangin a tul ang zelin MLA LADS Fund te pawh kan hmang chhunzawm zel ang a, kan Chief Minister zahawm tak leh ka thawhpui zawng zawng te pawn Zoram mipui chhuanchhama kan awm lohnan remchanna awm thei apiang dap zel hi an tum a ni.

"Ka bial mipuite tan ka ti thei ang ang ka ti zel ang a, kan dinhmun leh harsatna te inthlahrung hauh lovin kan inhrilh zel dawn a ni," Minister chuan a ti.

Minister hian Chhaolô khua a AH&Vety Department atanga Mithun Fodder(Sial chaw tur hnim) chinna hmun tur tlawh in a enfiah nghal bawk. Ruahman dan chuan he Mithun Fodder chinna hmun tur hi Chhaolo leh Iana ramri bulah niin Minister hian a ngaipawimawh hle. COVID-19 hrileng hian kan Economy nasa takin a nghawng dawn a, Supply lamah harsatna kan tawk thuai dawn ngeiin a lang bawk. Hetianga ei leh bara harsatna tawk mai thei dinhmuna ding kan nih avangin he Mithun Fodder chinna hmun tur Hactare 300 vel hi tangkai taka hman tum niin; Vaimin ching phawt turin Minister hian ruahmanna tha tak a siam a. He ram hi Vaimim thatna hmun a nih avangin tharchhuak teuh thei tura beisei a ni.

Minister chuan Chief Minister Relief Fund atangin tanpuina sum fai leh amah Fund atangin Buhfai leh Silpauline hetiang hian a sem nghal bawk.

1). Noaotla- I --- Rs. 25,000 + Buhfai Bag 3 + Silpaulin 1

2). Noaotla- II ---Rs. 10,000 + Buhfai Bag 3+Silpaulin 1

3). Noaotla III - Rs. 10,000 & Buhfai Bag 2

4). Lobo I - Rs. 50,000 + Buhfai Bag 3 + Silpaulin 1

5). Lobo II - Rs. 50,000 + Buhfai Bag 3 + Silpaulin 1

6). Chhaolô I - Rs. 10,000 & Buhfai Bag 3

7). Chhaolô II - Rs. 10,000 & Buhfai Bag 3

8). Chhaolô III - Rs. 10,000 & Buhfai Bag 3

CM Relief Fund hi State Task Force in an dinhmun leh Location azira Category pathum a then zulzuia semchhuah a ni. Heng bakah hian VLTF hrang hrang ten Minister hnena harsatna an thlente a theih ang angin tihhlawhtlin thuai a tum bawk. Khaw tina VLTF te chuan Minister ngeiin a hmunah ngei an dinhmun enpui a, an mamawh ang ang te a ngaituahsak zel avangin thlamuanthlak an ti thu sawiin lawmthu an lo hrilh hlawm a ni.

Minister hi Pu HC. Lalmalsawma Zasai, Opposition Leader, MADC; Pu HC. Biakcheua, MDC; Pu N. Lalrosanga, MDC; Dr. Sahlu Khaila, DVO; Pu N. Vabeiratlua, IPRO; Pu NT. Thatlua, Ex-MDC; Pu Francis Lapi, Joint Secy, MNF Siaha District; Pu M. Baithai, Prrsident,MJA, Siaha District Editor leh midang ten an tawiawm a ni.