No.3068/2021-2022

Aizawl, the 20th November, 2021: Vawiin khan Minister of State for Social Welfare, AH&Vety, Excise & Narcotics, Sericulture Dr. K. Beichhua chuan a bialchhung khawchhak tlangdunga khaw hrang hrangte tlawhin sorkar hmalakna te a hmunah a enfiah nghal.

Social Welfare Minister Dr.K. Beichhua hian Noaotla khua tlawh hmasa berin Eklavya Model Residential School sak mek a tlawh a, Boys Hostel building sak meka a ban phun dan duhthusam lo deuh te chu Pi Sangchhin Chinzah, Secretary, Social Welfare leh  Engineer te nen enfiah nghalin, vuak thiata sak that an rel nghal a ni.

Lobo khua a tlawhnaah NEC atanga Cheng Vaibelchhe 51 senga Lobo-Tluangram-Hakha (Myanmar) inkalpawhna  kawng sial tur a hmunah tlawhin a enfiah nghal. Dr. Beichhua chuan kawngpui sial turah Lobo khaw mipuiin Compensation beisei lova, an ram phal taka an pe chu lawmawm a tih thu leh Lobo khua chuan a Model Village a nih angin Mizoram tan entawn tur tha tak an hnutchhiah a ni, a ti.

Kawngpui sial tura chenna in a tihchhiat tur chungchangah hna thawk tur, Tantia Company-a an Project Director BL Sajitsaria nen a hmunah inbe nghalin, sorkar atanga zangnadawmna pek theih a nih loh avangin Chenna In chhe tur te chu chhawmdawlna ruahmansak turin a ngensak nghal a, contractor lam pawhin Minister ngenna chu an ngaihpawimawh thu leh an hnathawh na avanga harsatna tawkte chu a chhawmdawl hna an thawhzui thin thute an lo hrilh a ni.

Lobo khuaah hian Dr. K. Beichhua chuan Buh thar tam ber Pu C. Tyuhra hnenah Rs 20,000 tanpuina a hlan nghal a, ani hian kuminah buh tin 300 a thar a ni.

Chhaolo khuaah Minister Dr.K.Beichhua chuan Agriculture Department in loneitute hman atana Vaimin Herna Khawl (Complete Maize processing machine) an pek chu a commission nghal bawk. He vaimim herna khawl hian hna chithum a thawk thei a, a kawr a kheh a, a mal a, a her dip thei nghal a ni.  Chhaolo khuaah hian Farming Society 12 awmin, chhungkaw 68 in Vaimin hmun neiin, kumin hian Vaimin Tin 10,000 chuang an neih thu an sawi. Agriculture Dept. chu a Farming society te hnenah hian  Vaimim herhdip dahna tur Satha-ip leh athuina khawl (Sewing Machine) leh a bukna(Weighing machine) an pe bawk.

Dr.K.Beichhua chuan Vaimin chi sema nikuma lama hma an lo lak tawhna chu hlawhchham mahse, kuminah a hlawhtlinna kan hmu ta a ni, tiin, lawmawm a tih thu a sawi a, tihtak zeta thawktute tanpui hi sorkar thiltum a ni, a ti. Thawk mang lo ei tum kan tam hian kan ram a tichhia a, hemi kawngah kan harhthar zel hi lawmawm a tih thu a sawi.

Chhaolo khuaa AH&Vety Department hmalakna en nghalin, ranchaw chinna leh sial vulhna hmun a tlawh nghal bawk. Dr Beichhua chuan Vety Department in ranchaw an chinte chu a chi siamchhuak thei turin tun dinhmunah a inbuatsaih mek tih a sawi a, tun atang reiloteah ranchaw chi an siamchhuah theih a beisei thu a sawi. Chhaolo khuaa sial vulhtute hian tun dinhmunah sial 300 an nei mek a ni.

Chhaolo khuaah vek hian Sericulture Department atanga SEDP kaltlanga pangngang khawi tanpuina dawngte hnathawh a enfiah nghal bawk a, an hnathawh te tha leh lawmawm a tih sawiin, a thawk tha lo an awm anih erawh chuan tanpuina 2nd Installment thlenga hrensak an nih tur thu a sawi. Minister hian Chhaolô khuaa chhawchhi thar hnem ber Pu NT.Vasu hnenah lawmman tangkafai a pe bawk. ICAR-National Research Centre on Mithun Medziphema Nagaland te, KVK,Siaha leh AH&Vety,Siaha te  huaihawtin  Sial vulhtute hnenah Tribal Sub plan(TSP) materials a sem bawk.

Minister of State Dr. Beichhua chuan Noaotla khaw daia kum 1990-a Excise & Narcotics Sub Inspector pakhat leh Constable pakhat misual kut tuara an thihna hmun a en bawk a, Lungphun tha zawka siam dan turte pawh Excise Commissioner Pu Ngurchungnunga Sailo nen an sawidun nghal a ni.

Dr. K. Beichhua hi Social Welfare Secretary Pi Sangchhin Chinzah, AH&Vety Director Dr. H. Laltlanmawia, Sericulture Director Pu Lalrozama, Women & Child Development Department Director Pi Lallianpuii, Excise & Narcotics Commissioner Pu Ngurchungnunga Sailo leh official dangten an tawiawm a ni.