2970/2022-2023
Lunglei the 7th December, 2022 – Lunglei South AC bialtu MLA & Vice Chairman, Bamboo Development Board Dr K. Pachhunga chuan nizan khan Lunglawn Branch YMA Education Committee buatsaih Zirlai Ti Tha Chawimawina program TOA Conference Hall a neih a hmanpui.

Zirlai Ti Tha Chawimawina program hi R. Lalnghaksanga’na kaihruaiin MC Lalruatfela’n Report a pe a. Lunglawn, Lunglei zirlai matric, HSSLC, graduate leh post graduate pass zirlai ti tha mi 41 an chawimawi an ni a. HSLC pass 60% chung lam hmu, HSSLCpass 75% chung lam hmu leh graduate chunglam chin University Top 10 a lang te chawimawi an ni. Hemi bakah hian University level topper te hnenah MLA Award hlan an ni.

Dr K. Pachhunga chuan Zirlai Ti Tha Chawimawina buatsaihtu Lunglawn Branch YMA Education Committee te an fakawm a tih thu sawiin he chawimawina program hian nghawng tha tak neiin zirlaite leh an nu leh pa te ti phur tu leh chona thar siam sak tu anih ngei a beisei thu a sawi a. Zirlaite chu tum mumal nei a, chhungkua, khawtlang leh ram tana chhawr tlak nih tum turin a chahin sawrkar hna piah lamah eizawnna dang – sumdawnna, mahni kutkawiha eizawnna te ngaihven tel turin a chah a. An hma hun lo kal zel turah a eng zawna thil thlir thiam thin tur leh an zirna leh hnathawhna dah pawimawh hmasa thin turin a chah a ni.