3093/2024-2025

Dated Lawngtlai, 20th November 2024 : Nizan dar 6:45 khan Chandmary Recreational Centre (CRC)  hawnna  leh Young Lai Association (YLA) General Conference Vawi 30- na Palai lawm inkhawm chu Chandmary Recreational Centre, Chandmary, Lawngtlaiah neih a ni a. Dr. Lorrain Lalpekliana Chinzah, Adviser to Chief Minister chuan khuallian niin a hmanpui.

Dr. Lorrain Lalpekliana Chinzah chuan Chandmary Recreational Centre (CRC) hawnna inkhawm a lo kalte - YLA dintute, CYLA leh Branch YLA OB- te, Lawngtlai West bialtu MLA, MDC (LADC),  State Officials, LADC Officials  leh YLA Member zawng zawngte  chibai a buk tih sawiin, a bik takin  YLA dintu zinga mi  Pu. F. Sanghulha'n alo telpui thei chu lawmawm a tih thu a tarlang a.  Chandmary Recreational Centre (CRC) chu a mamawhtuten tangkai taka an hman turin lawm takin a hawng tih a sawi a. CRC - din a nih theihna tura theihtawp chhuahtute zahna chibai a buk tih tarlangin Lawngtlai mipuiten tangkai taka an chhawr ngei a beisei tih a sawi bawk.

Dr. Lorrain Lalpekliana Chinzah chuan YLA Golden Jubilee lawmna rûnpui leh Young Lai Association (YLA) General Conference Vawi 30- na Palai Lawm inkhawm chu khuallian niin a hmanpui nghal a. Hetah hian thu sawiin Khuallian chuan, khawtlâng leh ram siamtha turin mitinin mawhphurhna an neih  rualin thalaite mawhphurhna a sâng bik hle a, chhiat thata khawtlang enkawltu ber an nih avangin  thalaiten nun vawn uluk a tul tak zet a ti.  Ram leh hnam dinchhuah nana pawimawh ber chu Pathian tih a nih thu sawiin, Kohhran leh sakhaw  zirtirna ngaihpawimawh thar a tul tak zet a ti. YLA kum 50-  tlin  lawm a nih  rual  hian Kohhran ngaihsak kawngah leh zu leh ruihhlo laka fihlim tura  hmalak kawngah tan  thar i tum ang u tiin a sawm a. Khuallian chuan  Lai hnam dinchhuahna atana pawimawh em em -  Rinawmna, Dikna leh Huaisenna vawng nung thar turin kalkhawmte a chah bawk. Adviser to Chief Minister chuan ram leh hnam humhalhna pakhat atan Lai hming put uar pawh a tul hle nia a hriat thu sawiin, hnam dangin kan nihna an hriatchianna hmasa ber a nih avangin i uar thar ang u a ti a. Fa neih tam pawimawhna sawiin Dr. Lorrain Lalpekliana Chinzah chuan hnam tizahawm leh tihmasawn tura  mitin  mawhphurhna lian ber chu fa neih tam hi a ni tiin, fa nei tam turin Laifate a fuih a. Tawng, hnamzia leh nihna humhalh kawngah tun aia nasa zawk a tan lak a tul thu tarlangin, inchhûngkhurah leh YLA thil tihna  bakah a remchan dan ang zela theihtawp chhuah thin  turin a chah.

Dr. Lorrain Lalpekliana Chinzah chuan Myanmar leh Bangladesh ram buai avanga raltlan lo lûtte chu  ruihlo leh dan phalloh  laka fihlim turin a chah a. Û leh nau  an nih anga Lairam leh hnam chu  hmangaihpui turin a sawm a ni. HIV-AIDS bikah Lawngtlai chu a  hluarna district a nih mek thu sawiin, hei hi thil pawi tak a ni tiin, inchiuna thianghlim lo in hman tawm leh mipat hmeichhiatna hman kawnga fimkhur thar turin YLA member leh  kalkhawmte a chah a. Khuallian chuan zirna kawnga Lawngtlai District - a hnufual bik hle chu mimal taka veiawm a tih thu a sawi a. Mizoram sawrkar bakah LADC ngei pawhin Zirna hmasawnna turin sum leh pai tam tak a seng a, sum leh pai sen ral enin, hmasawnna tur a la tam hle a ni, a ti. Zirna kawnga rahbi  thar kâi turin Zirtirtu leh zirlaite chauh pawimawh lo in, nu leh pa, khawtlang tanho ngai a ni tiin, hma thar la turin a sawm. Laifate zingah Competetive Exams- a inziak tling an  vang chho ta hle chu pawi a tih thu sawiin Khuallian chuan YLA member zinga  zirlaite chu  rual awhna nei a tan la thar  sauh sauh turin a chah.

Dr. Lorrain Lalpekliana Chinzah chuan YLA Kum 50 tlin lawmna puala buatsaih 'YLA Golden Jubilee Souvenir' chu mipuite chhiar theih turin a tlangzarh nghal bawk.

Zanin Chandmary Recreational Centre (CRC) leh Young Lai Association (YLA) General Conference Palai lawmna inkhawmah  hian Pu Ricky VL Hmingthanzuala, Secretary, YLA, Chandmary chuan CRC chungchang report tawi pekna a nei a, Pu Joseph Lalhmingthanga Chinzah, General Secretary, CYLA chuan Palai lawmna thu a sawi bawk. YLA General Conference vawi 30- na  hi ni 19 -21 November, 2024 chhung neih a ni ang.