2023/2026-2027

Lawngtlai, 1st September, 2026: Vawiin chawhma dar 11:00 AM  khan DC Conference Hall, Lawngtlaiah Commerce & Industies Department hnuaia Progress Partners- te hnena Chief Minister's Special Package semna neih a ni a. Dr. Lorrain Lalpekliana Chinzah, Adviser to CM (H&FW, A&FW) leh Lawngtlai East bialtu MLA nibawk chuan  khuallian nia hlanna hun neiin, Bawrhsap Pu Donny Lalruatsanga chuan hun a kaihruai.

Dr.Lorrain Lalpekliana Chinzah, chuan Bana Kaih hnuaia 'Chief Minister Special Pakage' Phase -II, semna hun tha tak neih  a ni chu lawmawm  tiin hun kaihruaitu Bawrhsap, DCIO, Line department leh Progress Partners kalkhawmte chibai bukna a nei a. Bana Kaih kaltlanga mi taima leh hlawhtlin tum tak tak ten leirem an rah theih nan sawrkarin tanpuina a pek thin thu sawiin, a dawngtute pawhin theihtawp chhuah a pawimawh tak zet a ti. Bana Kaih hnuaiah  'Chief Minister's Special Package'  leh 'Loan Component' te duan niin, Loan bikah sawrkar guarantor - ah tangin 'CM Special Package' chu rulh ngai lo a ni, a ti. Tuna sawrkar mek chu thlei bik nei lo leh mipui sawrkar anihna ang takin mipuite tan theihtawp chhuahin hna a thawk reng a; Bana Kaih Phase - I leh II chu  mi thahnem takin dinchhuahpui nan an lo hmang tawh tih sawiin, Phase III pawh kalpui tan leh mek a ni a, hlawhtlinna tam zawk hmuh zel a beisei awm a ni, a ti.

Adviser to Chief Minister chuan Bana Kaih chu 'Performance Oriented' veka kalpui tawh a nih thu sawiin, dik leh tha taka thawk,  mi taima leh dinchhuahpui tak tak turte hnenah chauh pek a ni zel tawh dawn a ti a. Mahni 'Trade' dilna ang taka sum leh pai pawh hman tur a ni a, thil dangah pawhpen a thianglo a ni, a ti. A hmu tur dik tak te chauhin an hmuh theih nan theihtawp chhuah a ni a, Dilna  Form- lutte uluk taka enfiah niin,  Line department ten Monitoring - pawh uluk takin  an kalpui mek a ni, a ti. Dr. Lorrain Lalpekliana Chinzah chuan Progress Partners- te chu Bana Kaih kaltlanga eizawnna rintlak leh ngelnghet an neih theihna tura theih tawp chhuah theuh tura chahin, hlawhtling vek turin duhsakna a hlan nghal  bawk.

Bawrhsap leh Chairman ni bawk Pu Donny Lalruatsanga chuan 'CM Special Package' chu mi tumruh leh mahni kutkea dinchhuah tum te tan chuan Scheme tha tak a ni, a ti a. A thlawna pawisa dawngtu ni mai lo a, mahni dinchhuah nan a hmang turin a fuih a ni. A bik takin Progress Partners- te chu sawrkarin Bana a Kaih reng ngai lo a, mahnia intungnung leh dingchhuak zui thei tura thahnem ngai taka thawk turin a chah. Progress Partners- te chu an pawisa dawn chhan ang taka hmanga thawk tur leh 'CM Special Package' hmang tha ber ni tura chahin, Line Department - te pawh thahnem ngai taka endik zui fo thin turin a chah nghal a ni.

Vawiin hun hmannaah hian Bana Kaih (Hand Holding) Scheme hnuaia Commerce & Industries Department, Lawngtlai kaltlanga  'Chief Minister's Special Pakage' Phase - II,  dawngtu Progress Partner - 75 te hnenah Rs.50,000/- theuh sem a ni a. Khuallian Dr. Lorrain Lalpekliana Chinzah chuan a hlan a ni. He hunah hian Pi Biakchungnungi, DCIO, Lawngtlai chuan lawmthu sawina neiin hun a khar a,  chawhnu lamah Progress Partners- te 'Training & briefing'  hun hman nghal  a ni.